Viadomaja žurnalistka i piśmieńnica Julija Łatynina ŭ svajoj pieradačy na «Echo Moskvy» zakranuła temu Respubliki Komi, jakaja ŭvachodzić u skład Rasii. Pryčynaj dla hetaha byŭ aryšt byłoha kiraŭnika Komi Viačasłava Hajziera, jakoha abvinavačvajuć u admyvańni hrošaj.
Naprykancy prahramy Łatynina ździviłasia, što, akazvajecca, u škołach Respubliki Komi vyvučajecca mova komi. «Mianie heta ŭzrušyła», — pryznajecca Łatynina.
«U škołach Respubliki Komi ŭkaraniałasia navučańnie vučniaŭ komi movie, što, naturalna, vyklikała niezadavolenaść baćkoŭ. Nasamreč hetaja historyja mianie absalutna ŭraziła, tamu što nu voś, u nas Uładzimir Uładzimiravič typu adstojvaje intaresy ruskich. Adna z rečaŭ, pra jakija, adstojvajučy intaresy ruskich, varta padumać, heta toje, što savieckaje falšyvaje dzialeńnie na respubliki zamiest raniejšych hubierniaŭ stvaraje patencyjał nastupnaha raspadu krainy.
Kali ŭ Respublicy Komi pačynajecie raskazvać, što tam u asnoŭnym žyvuć nie ruskija, a žyvuć komi, dy jašče vučyć movu — całkam biezadnosna da Hajziera — heta takaja duraść, jakoj prosta nie čakaješ ad ludziej, jakija tak skancentravany na intaresach abarony ruskich».
Mova Komi adnosicca da fina-vuhorskich. Na joj razmaŭlajuć u Komi, Piermskim krai, Kiraŭskaj vobłaści. Pavodle pierapisu 2010 hoda, kala 220 tysiač čałaviek źjaŭlajucca nośbitami movy komi. Na joj vychodzić niekalki haziet, časopisaŭ, internet-sajtaŭ. Hazieta «Komi mu» maje nakład u miežach 7 tysiač asobnikaŭ.
Varta adznačyć, što ŭ 2011 hodzie Ministerstva adukacyi Komi ŭviało abaviazkovaje vyvučeńnie komi movy ź pieršaha kłasa. Pryčym heta tyčycca nie tolki karennaha nasielnictva rehijona. Škoły mahli vybirać formu navučańnia movie — jak «rodnaj» (da 5 urokaŭ u tydzień) i jak «dziaržaŭnaj» (2 uroki).
Pavodle źviestak 2011 hoda, u Rasii jość 80 dziciačych sadkoŭ, dzie vychavańnie viadziecca na movie komi. A voś škoły, dzie asnoŭnaj movaj navučańnia była b komi, niama nivodnaj.
Historyk Alaksandr Paškievič u fejsbuku hetak prakamientavaŭ słovy Julii Łatyninaj: «Prosta cudoŭnaja cytata, jakuju navat i kamientavać patreby niama — nastolki jana krasamoŭnaja. «Iścinna ruski» čałaviek jak jon jość. Prytym heta nie niejki šavinist-čarnasocieniec viaščaje, a asoba nibyta z demakratyčnaha łahiera. Nie, hetuju krainu ničoha dobraha nie čakaje».
Varta nahadać, što ŭ razhar čarhovaha biełaruska-rasijskaha hazavaha kanfliktu Julija Łatynina zaklikała ŭvieści ŭ Biełaruś rasijskija vojski.
