Siońnia ŭ hrupie «UKantakcie» bara «DK» (vuł. Tałbuchina, 4) źjaviŭsia status: «Siabry, u nas važnaja navina dla vas! Z 1 listapada 2015 hoda bar DK spyniaje svajo isnavańnie.
Na heta jość peŭnyja pryčyny, pra jakija my raspaviadziem u chutkim časie. Kali łaska, pastaŭciesia z razumieńniem da našaha rašeńnia. Mir! Pavaha! I trošački smutku!»
Stvaralniki prajekta pakul nie kamientujuć pryčyny zakryćcia. Bar «DK» adkryŭsia viasnoj 2014 hoda. Tam pravodzili kancerty, adkrytyja paetyčnyja mikrafony, futbolnyja tranślacyi, pakazy filmaŭ, abmien sukienkami, viečarynki i hetak dalej. Uładalniki «DK» niadaŭna dali intervju sajtu Irl.by, u jakim na budučaje zakryćcio nijakich namiokaŭ byccam by nie było. Aleh Hiendrusieŭ, adzin z uładalnikaŭ, raspavioŭ, što da adkryćcia bara padobnaha dośviedu ŭ jaho nie było:
«U mianie nie było nikoli mary adkryć niešta padobnaje, usio adbyłosia spantanna i niečakana. Da taho, jak my adkryli «DK», byŭ momant, kali ja vyrašyŭ kardynalna źmianić vyhlad svajoj dziejnaści. Ja 8 hadoŭ pracavaŭ u prodažach, ramantavaŭ kampjutary. I heta stała prosta sumna. Ja zrazumieŭ, što žyćcio pieratvarajecca ŭ nabor adnolkavych dziejańniaŭ, jakija nie prynosiać nijakaha zadavalnieńnia. Ale «DK» nie źjaviŭsia adrazu paśla taho, jak ja zachacieŭ pieramienaŭ. Ja prosta vyrašyŭ niešta mianiać, a što kankretna — było niezrazumieła.
2-3 miesiacy ja ničym nie zajmaŭsia. Ja paśpieŭ stamicca: za što b ja nie braŭsia, ja rabiŭ heta ź vialikaj samaaddačaj. Tyja miesiacy dapamahli mnie pryjści ŭ siabie. Asnoŭnaja ideja «adkryć niešta» była ŭ Lavona. (…) My ničoha nie viedali, nie mieli ŭjaŭleńnia, z čaho pačać. Ale nam było cikava, tamu my ŭzialisia za heta ź vielizarnaj samaaddačaj, entuzijazmam, usio trymałasia i trymajecca mienavita na hetym. Pracy zroblena i robicca vielmi šmat».
