Hledačy kancerta, pryśviečanaha 85-m uhodkam Uładzimira Karatkieviča, mahčyma, ničoha i nie zaŭvažyli. Bo da samaha pačatku ich nie puskali ŭ zału, pakul mianiali afarmleńnie sceny, admysłova zroblenaje da jubileju piśmieńnika-ziemlaka.
Zahadčyca rajonnaha adździeła ideałohii, kultury i pa spravach moładzi Hanna Śviatłova ŭbačyła ŭ afarmleńni sceny tradycyjny arnamient, namalavany čyrvonaj farbaj na biełym fonie. I zajaviła, što zdalok heta možna pryniać za «apazicyjny» bieł-čyrvona-bieły ściah. Techničnyja rabotniki haradskoha centra kultury musili vykonvać terminovy zahad – zaviešvać arnamient stylizavanymi ručnikami. Ale byli nastolki ździŭlenyja, što nie mahli nie padzialicca ŭražańniami sa svaimi znajomymi. I ciapier u Voršy šyroka abmiarkoŭvajuć, nakolki «aściarožničaje» čynoŭnica, kali navat arnamient padajecca joj «kramolnym». Asabliva ŭražvaje, što takija pieraściarohi prajavilisia ŭ admysłovy dla ŭsich aršancaŭ dzień – 26 listapada, na ŭhodki pismieńnika-ziemlaka Uładzimira Karatkieviča.
Jašče pra adnu pieraściarohu amatary biełaruskaha mastactva daviedalisia 27 listapada. Akazvajecca, Lina Hatoŭskaja, dyrektarka muzieja Uładzimira Karatkieivča, niečakana admianiła kancert Siarhieja Doŭhušava, artysta dziaržaŭnaj fiłarmonii, udzielnika Harmonic style project, SD i hrupy «Vuraj». Śpiavak raspavioŭ, što atrymaŭ aficyjnaje zaprašeńnie vystupić, skarektavaŭ dla hetaha svoj kancertny hrafik i raptam za dzień da kancertu atrymaŭ admovu pa elektronnaj pošcie. Razam z prabačeńniami dyrektarka muzieja patłumačyła artystu pryčyny: maŭlaŭ, litaralna napiaredadni byli ŭniesieny źmieny ŭ prahramu, i zamiest jaho vyrašana było ŭklučyć u kancert inšych, miascovych vystupoŭcaŭ.
Darečy, Siarhiej Doŭhušaŭ taksama ličyć siabie «miascovym» – jon naradziŭsia na Aršanščynie, nie adnojčy tut vystupaŭ, u tym liku i ŭ muziei Uładzimira Karatkieviča. Adnak, pavodle jahonych słovaŭ, usie stasunki z hetaj ustanovaj jon hatovy spynić. I vystupić 27 listapada u vuzkim siabroŭskim kole prychilnikaŭ-słuchačoŭ.
