Biełaruskija pravaabarončyja arhanizacyi pryznali palityčnym źniavolenym Michaiła Žamčužnaha, zasnavalnika ciapier zakrytaj ustanovy «Płatform inaviejšn», jakaja zajmałasia pytańniami parušeńnia pravoŭ ludziej, što znachodziacca ŭ miescach pazbaŭleńnia voli. Adpaviednaja zajava apublikavanaja 7 śniežnia na pravaabarončym sajcie spring96.org.
Pad tekstam dakumienta padpisalisia staršynia likvidavanaha ŭładami pravaabarončaha centra «Viasna» Aleś Bialacki, staršynia Biełaruskaha Chielsinkskaha kamiteta Aleh Hułak, staršynia praŭleńnia Centra pravavoj transfarmacyi (Lawtrend) Alena Tankačova, kiraŭnik kamiteta dapamohi represavanym «Salidarnaść» Ina Kulej, kiraŭnik Biełaruskaha dakumientacyjnaha centra Raisa Michajłoŭskaja, prezident Biełaruskaha doma pravoŭ čałavieka imia Barysa Zvozskava Taćciana Raviaka i eks-staršynia Biełaruskaj asacyjacyi žurnalistaŭ Žanna Litvina.
«Asudžeńnie Michaiła Žamčužnaha źjaŭlajecca nieabhruntavanym i palityčna matyvavanym. Ličym, što pazbaŭleńnie Žamčužnaha svabody było ažyćcioŭlena z parušeńniem prava na spraviadlivy sudovy razhlad, harantavany Mižnarodnym paktam ab hramadzianskich i palityčnych pravach. Pazbaŭleńnie voli było zasnavanaje na pastaŭlenych u vinu dziejańniach, spravakavanych pradstaŭnikami ŭłady, a značyć niezakonnych, a praciahłaść ci ŭmovy pazbaŭleńnia voli vidavočna niepraparcyjanalnyja pravaparušeńniu, u jakim asoba była pryznanaja vinavataj», — havorycca ŭ zajavie.
Pravaabaroncy ličać nieabchodnym zapatrabavać nieadkładnaha pierahladu sudovaha rašeńnia ŭ dačynieńni da Žamčužnaha «pry zachavańni prava na spraviadlivy sudovy razhlad».
U listapadzie hetaha hoda biełaruskija hramadskija aktyvisty pačali źbirać podpisy pad zvarotam u mižnarodnyja pravaabarončyja arhanizacyi z zaklikam pryznać palitźniavolenymi dyrektara i zasnavalnika «Płatform inaviejšn» — Andreja Bandarenku i Michaiła Žamčužnaha adpaviedna.
Andrej Bandarenka 12 žniŭnia 2014 hoda byŭ pryznany sudom Kastryčnickaha rajona Minska vinavatym pa troch častkach artykuła 339 KK (chulihanstva, złosnaje chulihanstva, asabliva złosnaje chulihanstva) i pryhavorany da čatyroch hadoŭ pazbaŭleńnia voli ŭ kałonii ŭzmocnienaha režymu. U suviazi z amnistyjaj termin byŭ skaročany da troch hadoŭ.
Michaił Žamčužny byŭ zatrymany nieŭzabavie paśla vyniasieńnia pryhavoru Bandarenku. 10 lipienia 2015 hoda Viciebski abłasny sud pryznaŭ jaho vinavatym na padstavie artykułaŭ 376 (č. 1, č. 2), 375 (č. 1) i 431 (č. 1, č. 2) KK (naŭmysnaje vydavańnie źviestak, što składajuć słužbovuju tajnu; niezakonnaje nabyćcio (vyrab) srodkaŭ dla sakretnaha atrymańnia infarmacyi, što składaje słužbovuju tajnu; davańnie chabaru) i pryhavaryŭ da šaści hadoŭ pazbaŭleńnia voli ŭ kałonii strohaha režymu.
23 kastryčnika sudovaja kalehija pa kryminalnych spravach Viarchoŭnaha suda Biełarusi razhledzieła kasacyjnuju skarhu na pryhavor i pryznačyła Žamčužnamu bolš strohaje pakarańnie — šeść z pałovaj hadoŭ pazbaŭleńnia voli.
