Kino: «Pra kachańnie»
Žanr: kamiedyja
Režysior: Hanna Mielikian
U rolach: Renata Litvinava, Michaił Jafremaŭ, Maryja Šałajeva, Vasil Rakša, Julija Śnihir, Uładzimir Maškoŭ, Alaksandra Borcič
Rasija, 115 chv.
Adznaka: 6.
Niekalki samych roznych piersanažaŭ i historyj pieraplata- jucca razam. Usie jany pra kachańnie: maładaja para, jakaja žyvie ŭ vobrazach japonskich anime-hierojaŭ i nikoli nie bačyli adno adnaho biez hrymu; sakratarka, jakaja atrymała nieprystojnuju prapanovu ad svajho bosa; japonka, jakaja pryjechała ŭ Maskvu ŭ pošukach ruskaha mužčyny; mastak-hraficist u pošukach pryhažości; byłaja žonka, naniataja svaim mužam dla niezvyčajnaha zadańnia.
Novaja stužka rasijskaj režysiorki armiana-azierbajdžanskaha pachodžańnia, uładalnicy «Załatoha miadźviedzia» za film «Rusałka» (2007) Hanny Mielikian uziała hałoŭny pryz na «Kinataŭry»-2015.
Pieršapačatkova režysiorka źniała dźvie karotkamietražki na temu kachańnia, jakija chutka nabrali šmat pazityŭnych vodhukaŭ u internecie. Vynikam pracy staŭ poŭnamietražny tvor pa ŭłasnym scenary na tuju ž temu.
Film sabraŭ viadomych akcioraŭ sučasnaha rasijskaha kino. Renata Litvinava vykanała rolu viadomaha psichołaha, jakaja čytaje lekcyju pra kachańnie. Jaje skraznaja scena stvaraje ahulnuju kanvu dla kožnaj ź nievialikich, viasiołych i dramatyčnych historyj. U ich biaruć udzieł zakachanaja dziaŭčyna-milicyjant — Raŭšana Kurkova, aryštavanyja prychilniki anime — Maryja Šałajeva i Vasil Rakša, japonskaja turystka, zakachanaja ŭ Rasiju,— Mijaka Šymamura, źniervavany top-mieniedžar — Uładzimir Maškoŭ, vuličny mastak, zakachany adrazu ŭ dźviuch dziaŭčat,— Jaŭhien Cyhanoŭ.
U stužcy źnialisia i sapraŭdnyja kasplejery, a japonskaja aktrysa śpiecyjalna dla zdymak navučyłasia ihrać na hitary.
Fonam dla historyj vystupaje mituślivaja Maskva. Častkaj haradskoj atmaśfiery vystupajuć pieśni muzykaŭ Noize MC i Jołki.
Interaktyŭnyja elemienty sučasnaha žyćcia znachodziać u Mielikian cikavaje ŭvasableńnie: hieroi aktyŭna karystajucca sacyjalnymi sietkami, smajły i instahramnyja fota imhnienna adlustroŭvajucca na ekranie.
Stužka ŭtrymlivaje eratyčnyja sceny i maje ŭzrostavaje abmiežavańnie 18+.
