U siecivie źjaviłasia fota z vyprabavańniaŭ nihieryjcami biełaruskaha procitankavaha rakietnaha kompleksu (PTRK) «Šeršań-D», jaki byŭ raspracavany sumiesna z ukrainskim KB «Łuč» i pačaŭ vyrablacca jašče ŭ 2010 hodzie.
Na fotazdymku vidać, što vyprabavańni pravodziacca nie na terytoryi Nihieryi, dzie niama takich piejzažaŭ. Tamu možna mierkavać, što nihieryjskaja vajennaja delehacyja prybyła ŭ Biełaruś dla vyprabavańniaŭ «Šeršnia», a paśla i padpisańnia kantrakta na pastaŭku dadzienaha ŭzbrajeńnia ŭ Nihieryju. Bolš nijakich padrabiaznaściej pra chod vyprabavańniaŭ nieviadoma.
Na dadzieny momant Nihieryja viadzie baraćbu suprać terarystyčnaj hrupoŭki «Boka Charam», jakaja źjaŭlajecca miascovaj «filijaj» suśvietna viadomaj «Isłamskaj dziaržavy».
«Šeršań-D» — heta madyfikacyja biełaruskaha PTRK «Šeršań» treciaha pakaleńnia, jaki vypuskajecca biełaruskaj kampanijaj SRPC. Pryznačany dla źniščeńnia braniatechniki, abaronienych abjektaŭ (typu bunkier, DAK, DZAK) i nizkalatučych małachutkasnych celaŭ (viertalotaŭ, BPŁA). Źjaŭlajučysia praciaham procitankavaha kompleksu «Skif», «Šeršań» pieraŭzychodzić jaho pa šerahu paramietraŭ, a taksama realizuje inžyniernyja rašeńni, unikalnyja siarod kankurentaŭ. Pryniaty na ŭzbrajeńnie armii Biełarusi.
