Kancern «Biełnaftachim» inicyjuje pravierki jakaści aŭtamabilnaha paliva na AZS arhanizacyj, jakija nie ŭvachodziać u skład «Biełnaftachima». Pra heta paviedamiła pres-sakratar kancerna Maryna Kaściučenka. «Značnaje źnižeńnie tempieratury pavietra paciahnuła za saboj šmatlikija zvaroty ŭ kancern aŭtamabilistaŭ, jakija vykarystoŭvali dyzielnaje paliva, nabytaje na AZS, jakija nie ŭvachodziać u sistemu kancerna. Hramadzianie prosiać arhanizavać pravierku jakaści nabytaha na inšych AZS dyzielnaha paliva, pierš za ŭsio jaho najnižejšaj tempieratury filtravańnia, bo ŭžo pry tempieratury 15-17 hradusaŭ sa znakam minus paliva pačynaje «parafinavacca» i rabicca nieprydatnym da vykarystańnia.
Pytańni hramadzian vyklikaje taksama poŭnaje zakryćcio niekatorych AZS zamiežnych kampanij pry ŭzmacnieńni marozu», - raspaviała Maryna Kaściučenka. Pres-sakratar kancerna źviarnuła ŭvahu, što zhodna z zakanadaŭstvam padobnyja pravierki pravodziać Kamitet dziaržkantrolu, Dziaržstandart, prakuratura i šerah inšych viedamstvaŭ. Kancern «Biełnaftachim» u hety pieralik nie ŭvachodzić. «Naša arhanizacyja całkam kantraluje jakaść tolki taho matornaha paliva, jakoje vyrablajuć biełaruskija NPZ i realizujuć aŭtazapravačnyja stancyi «Biełarusnafta», - patłumačyła jana. Kancern «Biełnaftachim» u zimovyja marazy rekamienduje aŭtamabilistam pierad zapraŭkaj aŭtamabila znajomicca na AZS z pašpartam jakaści realizavanaha paliva i harantuje adpaviednaść biełaruskaha dyzielnaha paliva i bienzinu, jaki realizujecca na zapraŭkach «Biełarusnafta», usim zajaŭlenym paramietram jakaści. Pryčym zimovaje dyzielnaje paliva vytvorčaści AAT «Naftan» i Mazyrskaha NPZ DT-Z-K5 hatunak F, jakoje pa narmatyvie pavinna mieć najnižejšuju tempieraturu filtravańnia nie vyšej za 20 hradusaŭ sa znakam minus, maje «zapas tryvałaści» da minus 25 hradusaŭ. Pry ŭzmacnieńni marazoŭ da minus 20 hradusaŭ i nižej rekamiendujecca vykarystoŭvać dyzielnaje paliva z uzmocnienymi nizkatempieraturnymi charaktarystykami (DT-Z-K5 kłas 2, «Arktyka»). Dadzieny vid paliva biełaruskaj vytvorčaści filtrujecca pry tempieratury da minus 32 hradusaŭ. Pa słovach Maryny Kaściučenka, u suviazi z častymi zvarotami hramadzian «Biełnaftachim» znoŭ źvierniecca ŭ Dziaržstandart z prapanovaj arhanizavać pravierku jakaści paliva na AZS arhanizacyj, jakija nie ŭvachodziać u skład «Biełnaftachima».
