Upraŭleńniem Śledčaha kamiteta Respubliki Biełaruś pa Hrodzienskaj vobłaści zavieršana rasśledavańnie i nakiravanyja ŭ sud try kryminalnyja spravy pa faktach arhanizacyi niezakonnaj mihracyi.
Ustanoŭlena, što z 2012 pa žnivień 2014 hoda hadoŭ zvyš 40 hramadzian Respubliki Biełaruś, Azierbajdžana, Tadžykistana i Vjetnam,a arhanizavali złačynnuju hrupu. Jany tranzitam praź Biełaruś pierapraŭlali ŭ Jeŭrasajuz mihrantaŭ z Vjetnamu. Ahułam złačyncy «dapamahli» bolš čym 150 vjetnamcam.
U žniŭni 2014 pravaachoŭniki zatrymali ŭ Ašmianskim rajonie dvuch udzielnikaŭ arhanizavanaj hrupy, jakija niezakonna pieramiaščali praź miažu 8 mihrantaŭ. Nieŭzabavie vyśvietlili i astatnich «pamočnikaŭ».
U chodzie śledčych dziejańniaŭ ustanoŭlena, što ŭ arhanizavanaj złačynnaj hrupie isnavała vyraznaja ijerarchija, dziejničaŭ pryncyp raźmierkavańnia rolaŭ, miełasia adładžanaja sistema suviazi i kanśpiracyi. Da taho ž, kožny mihrant vypłačvaŭ ŭznaharodžańnie za tranzit. «Dapamoha» kaštavała ad 6 da 15 tysiač dołaraŭ ZŠA.
Pa nakiravanych u sud kryminalnych spravach dziejańni 12 abvinavačanych kvalifikavanyja jak arhanizacyja niezakonnaj mihracyi zamiežnych hramadzian. U dačynieńni da dvuch ź ich sudom vyniesieny abvinavaŭčy prysud. Jany atrymali pa try hady pazbaŭleńnia voli z adbyvańniem jaho ŭ papraŭčaj kałonii ŭzmocnienaha režymu i z kanfiskacyjaj majomaści.
Rasśledavańnie ŭ dačynieńni da astatnich praciahvajecca. Nakładzieny aryšt na ich majomaść, u tym liku na aŭtamabili i hrašovyja srodki (na ahulnuju sumu kala 1,5 miljarda rubloŭ). Zatrymanyja hramadzianie Vjetnama departavanyja z Respubliki Biełaruś.
