Padrabiaznaści trahiedyi ŭ Słucku z hibiellu dvuch žančyn u charčabłoku kaviarni, jakaja adbyłasia 5 lutaha, paviedamiŭ telekanał STV u viačerniaj prahramie «24 hadziny».
Pavodle infarmacyi Śledčaha kamiteta, razhladajucca roznyja viersii zdareńnia, u tym liku atručeńnie čadnym hazam. 5 lutaha kaviarnia pracavała pa śpieczakazie, žančyny hatavali ježu dla mierapryjemstva. Pa fakcie słužbovaj chałatnaści, jakaja pryviała da hibieli dvuch čałaviek, raspačataja kryminalnaja sprava pa art. 428 KK. Staršynioj Śledčaha kamiteta jana ŭziataja na asabisty kantrol.
Pavodle infarmacyi STV, trahiedyja adbyłasia ŭ kaviarni na vulicy Sierpuchaŭskaj. Dźvie žančyny, jakija pražyvali nasuprać ustanovy, hatavali dla bankietu, budynak byŭ začynieny na absłuhoŭvańnie. Cieły znajšła cyrulnica, siabroŭka adnoj z zahinułych. Jana pracavała pobač.
Adna z zahinułych tydzień tamu zasialiłasia va ŭłasnuju kvateru, u druhoj sirotami zastalisia dvoje dziaciej.
Miascovyja žychary vielmi zaniepakojenyja tym, što adbyłosia, kažuć, što čuli pra ŭciečku hazu daŭno, a na heta nichto nie źviartaŭ uvahu. Adna z susiedak vielmi chvalujecca, bo źbirałasia ŭ hetaj kaviarni ŭ mai śviatkavać jubilej.
Administracyja kaviarni ad jakich-niebudź kamientaroŭ kateharyčna admoviłasia.
Nahadajem, padobnaja trahiedyja adbyłasia ŭ Barysavie 27 studzienia. Pavodle papiaredniaj viersii mienavita čadny haz zabiŭ šeść čałaviek, u tym liku dvaich dziaciej.
