20 lutaha pa błahasłavieńni pravialebnaha Stefana, biskupa Homielskaha i Žłobinskaha ŭ parafii chrama Praabražeńnia Haspodniaha (Homiel) upieršyniu projdzie Boskaja Liturhija ź pierakładam na movu žestaŭ dla ludziej z parušeńniem słychu.
Jak paviedamiŭ nastajaciel chrama Praabražeńnia Haspodniaha Aleh Kastrama, u pierakładzie nabaženstva na movu žestaŭ buduć brać udzieł śviatar Ryhor Kryžanoŭski i Kaciaryna Dziatłava. Jany ŭžo šmat hadoŭ kuryrujuć kirunak pa pracy ź ludźmi sa słabym słycham va Ukrainie, pry Śviata-Ioninskim manastyry Kijeva, arhanizoŭvajuć navučalnyja sieminary i dapamahajuć stvarać carkoŭnyja abščyny, dzie ludzi z parušeńniem słychu pačynajuć rabić svaje ŭśviadomlenyja kroki da Boha.
«Raniej pravodziłasia peŭnaja praca ŭ hetym kirunku, pravodzili malebien na movie žestaŭ, ale liturhija pravodzicca ŭpieršyniu. Vierniki sa słabym słycham zmohuć spaviadacca na movie žestaŭ i pryniać paŭnacenny ŭdzieł u nabaženstvie», — adznačyŭ śviatar.
U ramkach pracy misijanierskaha adździeła Homielskaj jeparchii taksama robiacca pieršyja kroki pa arhanizacyi pracy ŭ hetym kirunku. Joj zajmajecca ajciec Alaksandr Prankievič, kliryk prychoda chrama ŭ honar ikony Božaj Maci «Skorapasłušnica». Małady śviatar sam vyrašyŭ vyvučyć movu žestaŭ z metaj dzialicca radasnaj i dobraj viestkaj pra Chrysta ź ludźmi, jakija majuć parušeńnie słychu.
Kliryk prychodu spadziajecca, što liturhii na movie žestaŭ zmohuć uvajści ŭ praktyku i bolš ludziej pačujuć dobruju viestku.
Nastajaciel chrama zaprašaje ŭsich žadajučych na nabaženstva z žestavym pierakładam, sustreču z haściami z Ukrainy, a taksama maładych ludziej, kamu cikava budzie dałučycca da pracy ŭ hetaj niaprostaj spravie.