Pieršyja asoby kampanii «Trajpł» i zatrymanyja razam ź imi supracoŭniki kampanii, padazravanyja ŭ ździajśnieńni złačynstva i saŭdziele ŭ im, zastajucca pad vartaj.
Viadomy biełaruski biźniesmien Juryj Čyž jašče ŭletku sam źviarnuŭsia ŭ Kamitet dziaržbiaśpieki sa skarhaj na prablemy z vypłataj padatkaŭ u kampanii «Trajpł», jakija ŭźnikli z-za dziejańniaŭ saŭładalnika i jaho namieśnika Uładzimira Japryncava, paviedamiŭ žurnalistam u aŭtorak staršynia KDB Valeryj Vakulčyk. Zvarot Čyža padtrymali i dva jaho rasijskija partniory.
Druhi čałaviek u kampanii «Trajpł» — Uładzimir Japryncaŭ i jaho syn Kaźbiek byli zatrymanyja ŭ žniŭni minułaha hoda. U piatnicu 11 sakavika 2016 hoda stała viadoma ab zatrymańni samoha Juryja Čyža, a taksama pra pieratrusy ŭ kampanii «Trajpł». Pavodle infarmacyi pravaachoŭnych orhanaŭ kiraŭnictva kampanii padazrajecca va ŭchileńni ad vypłaty padatkaŭ.
«Aryštavana [pa spravie Čyža] piać čałaviek, adzin zatrymany», — paviedamiŭ Vakulčyk.
Pavodle jaho słoŭ, pakul KDB pracuje tolki niekalki dzion i ŭžo havorka idzie pra niavypłačanyja padatki na miljardy rubloŭ. U pryvatnaści, Čyžu stavicca ŭ vinu stvareńnie fiktyŭnaj firmy.
TAA «Trajpł» zajmajecca impartam i pierapracoŭkaj nafty i pastaŭkami naftapraduktaŭ na ekspart, inviestycyjami ŭ žyłuju i kamiercyjnuju nieruchomaść, budaŭničymi pasłuhami i dystrybucyjaj budmateryjałaŭ, prajektavańniem, transpartnymi pasłuhami, sielskaj haspadarkaj. Jak vynikaje sa spravazdačy ministerstva ab dziejnaści emitentaŭ ablihacyj, za try kvartały 2015 hoda «Trajpł» atrymaŭ čystuju stratu 51,5 miljarda rubloŭ — heta prykładna tracina ad vałavoj vyručki za hety pieryjad.
