23 sakavika prykładna dvaccać čałaviek z čyrvonymi i biełymi pavietranymi šarykami prajšli pa miescach, źviazanych ź dziejnaściu ministra BNR Pałuty Badunovaj. Na 9 udzielnikaŭ ekskursii supracoŭniki Navabielickaha RUUS skłali pratakoły.
22 krasavika sudździa Aleh Charoška aštrafavaŭ člena BNF Ivana Adamienku na 20 bazavych vieličyń (700 tys. rubloŭ), člena Biełaruskaj asacyjacyi žurnalistaŭ Tacianu Bublikavu i člena BSDP (Hramada) Dźmitryja Kutasava — na 15 bazavych vieličyń (525 tys. rubloŭ). Člen AHP Alaksandr Pracko i aktyvist arhkamiteta pa stvareńni partyi «Biełaruskaja chryścijanskaja demakratyja» Śviatasłaŭ Šapavałaŭ pakarany 7 i 10 sutkami aryštu. Usie jany pryznany vinavatymi va ŭdziele ŭ składzie arhanizavanaj hrupy hramadzian u vuličnym šeści i praviadzieńni pikietu z metaj pryciahnieńnia hramadzian da svaich hramadzka‑palityčnych pohladaŭ. U jakaści dokazu ŭ sudzie demanstravaŭsia videazapis mierapryjemstva, jaki pravodzili supracoŭniki milicyi.
Žurnalistka Taciana Bublikava na sudzie zajaviła, što mieła redakcyjnaje zadańnie haziety «Tovariŝ» padrychtavać materyjał ab ekskursii. U paćvierdžańnie hetaha da materyjałaŭ spravy byŭ prykładzieny faks z redakcyi. Adnak, na dumku sudździ, žurnalistka nie «prysutničała, a brała ŭdzieł» u mierapryjemstvie. Pavodle słoŭ A.Charoški, udzieł u šeści prajaŭlaŭsia ŭ tym, što dziaŭčyna pryciahvała ŭvahu hramadzian da svaich hramadzka‑palityčnych pohladaŭ: da jaje sumački byli pryviazany pavietranyja šary. Žurnalistka zaŭvažyła, što dva šaryki na sumačcy byli biełaha koleru. «Ale palito na vas było čyrvonaje», — paryravaŭ sudździa.
23 krasavika ŭ sudzie Navabielickaha rajona buduć praciahvacca słuchańni ŭ dačynieńni da ŭdzielnikaŭ histaryčnaj ekskursii.