«Kažuć, što elektryčnaść treba ŭžo siońnia apłacić, potym pienia budzie!», «Dy nie, pa televizary kazali, što ŭ hetym miesiacy možna da 5 krasavika ŭsie apłacić», — biełarusy praciahvajuć abmiarkoŭvać temu apłaty «kamunałki». I kali raniej było pytańnie ab sumach, to ciapier — pra terminy.
Nahadajem, z-za taho što ŭvieś luty čynoŭniki pieraličvali taryfy, žyroŭki biełarusam pačali raznosić tolki siońnia, 25 sakavika. Tradycyjna hety dzień byŭ apošnim, kali možna było zapłacić za «kamunałku» bieź pieni.
Adnak hetym razam (ukaz pra novyja taryfy byŭ padpisany tolki 23 sakavika) termin apłaty praciahnuli. Tak, ministr ŽKH Alaksandr Cierachaŭ raspavioŭ u efiry Pieršaha nacyjanalnaha telekanała, što termin zrušvajecca na 5 krasavika. «Hramadzianie buduć mieć prava da 5 krasavika apłacić sumu pa rachunak-paviedamleńniem biez štrafaŭ i rachunak-paviedamleńniaŭ za praterminoŭku, bo heta nie pa vinie čałavieka, a pa abhruntavanych pryčynach», — zapeŭniŭ ministr.
Adnak siońnia ŚMI sa spasyłkaj na staličnych kamunalnikaŭ paviedamili: «Paradak płaty za spažytyja elektraenierhiju i haz nie źmianiŭsia. Raźličycca za dadzienyja pasłuhi nieabchodna da 25 sakavika.
Pa tłumačeńni źviarnulisia ŭ Ministerstva ŽKH. «Usio možna budzie apłacić da 5 krasavika», - zapeŭnili ŭ pres-słužbie ministerstva.
