Vypramieńvańnie mabilnaha telefona parušaje repraduktyŭnuju funkcyju ŭ žyvioł. Biełarus Hienadź Vieraščaka vypuściŭ pra heta manahrafiju, a karotki pierakaz daje hazieta «Navuka».
Na praciahu niekalkich hadoŭ biełaruskija navukoŭcy vyvučali ŭpłyŭ mabilnaha telefona na zdaroŭje samcoŭ žyvioł. Cikavili ich u pieršuju čarhu žyvioły «ŭ rańnim postnatalnym pieryjadzie» — dzieci. Nad prablemaj pracavali śpiecyjalisty z łabaratoryi endakrynałohii i bijachimii Instytuta radyjebijałohii NAN Biełarusi ŭ supracoŭnictvie z BDUIR.
Daśledniki vyjavili, što apramieńvańnie žyvioł na častotach 900 Mhc i 1800 Mhc na praciahu 8 hadzin štodnia na praciahu adnaho i dvuch miesiacaŭ upłyvaje na repraduktyŭnuju sistemu samcoŭ. U hrupie apramienienych žyvioł patomstva akazałasia mienšym, a pałavy bałans zrušyŭsia ŭ bok samcoŭ. Navukoŭcy adznačyli ŭ ich paskareńnie pałavoha raźvićcia, dyspraporcyju pracesu śpiermatahieniezu i padzieńnie žyćciazdolnaści pałavych kletak.
«Pry peŭnych umovach heta moža ŭjaŭlać niebiaśpieku dla zdaroŭja čałavieka, — piša navukoviec. — Jakija hetyja ŭmovy? Pierš za ŭsio, heta praciahłaść razmovy i intensiŭnaść sihnału. Kali niechta vykarystoŭvaje mabilny telefon bolš za hadzinu ŭ dzień, jon traplaje ŭ hrupu ryzyki. Nieabchodna taksama ŭličvać asabliva vysokuju adčuvalnaść da ŭździejańnia elektramahnitnych paloŭ rastučaha arhanizma, i tamu varta abmiažoŭvać abo zabaraniać vykarystańnie mabilnikaŭ dzieciam i padletkam».
Raniej navukoŭcy ź inšych krain užo prychodzili da padobnych vysnoŭ. Naprykład, u lutym 2016 hoda izrailskija navukoŭcy raspaviali pra suviaź pamiž zvyčkaj nasić smartfon u kišeni štanoŭ i kancentracyjaj śmiermatazoidaŭ u siemiavaj vadkaści čałavieka.
