Budynak pieršaj minskaj elektrastancyi, jaki razabrali z-za budaŭnictva haścinicy kala parku Horkaha, užo nie adnavić.
Zamiest hetaha čynoŭniki prapanujuć uviekaviečyć imia hrafa Čapskaha (jon staŭ meram Minska ŭ 1890 hodzie), stvaryŭšy makiety budynkaŭ, jakija byli pabudavanyja pry jaho žyćci. Takuju ideju vykazaŭ načalnik upraŭleńnia pa achovie historyka-kulturnaj spadčyny i restaŭracyi Ministerstva kultury Ihar Čarniaŭski.
Pavodle jaho słoŭ, kankretnych terminaŭ pa adnaŭleńni elektrastancyi niama. Zhodna z ukazam prezidenta, Ministerstva kultury sumiesna ź Minharvykankamam i kampanijaj «Trajpł» (mienavita jana budavała haścinicu) pavinny pryniać uzhodnienaje rašeńnie pa hetym pytańni. Ihar Čarniaŭski zapeŭniŭ, što varyjanty rašeńniaŭ prapracoŭvajucca, ale tyja prapanovy, što ŭžo razhladalisia, nie zadavalniajuć Ministerstva kultury.
— Vykažu asabista majo mierkavańnie. Adnavić budynak užo niemahčyma, ale možna pahladzieć na hetuju temu bolš šyroka. My ŭsie čujem, bačym pa televizary imia hrafa Čapskaha. A što my pra jaho viedajem? Što my bačym? Akramia zavoda «Alivaryja», u Miensku mahła b być stvorana placoŭka, dzie było b ŭviekaviečana jaho imia. Vodapravod, elektryčnaść u Miensku ŭ tyja časy byli zroblenyja ŭ tym liku za jaho asabistyja srodki. Napeŭna, varta było b ŭstalavać jamu pomnik, adnavić tam elemienty elektrastancyi, pastavić makiety znakavych budynkaŭ, jakija byli stvoranyja ŭ pieryjad jaho dziejnaści ŭ Minsku. Pole tvorčaści jość dla architektaraŭ, chaciełasia b, kab jany bolš aktyŭna i ŭjedliva ŭrezalisia ŭ hetuju temu, — skazaŭ Ihar Čarniaŭski.
Nahadajem, budynak pieršaj haradskoj elektrastancyi pabudavali pry Karali Čapskim. Pabudova kanca XIX — pačatku XX stahodździa ŭjaŭlała ŭzor nieahatyčnaj industryjalnaj architektury. Paśla vajny ad jaje pieršapačatkovaha vyhladu zachavałasia tolki dva frahmienty, astatniuju častku budynka adnavili ŭžo ŭ inšym styli. Tym nie mienš zbudavańnie značyłasia ŭ pieraliku historyka-kulturnych kaštoŭnaściaŭ.
Kali ŭčastak, na jakim raźmieščana elektrastancyja, addali inviestaru pad budaŭnictva haścinicy kala parku Horkaha, frahmienty elektrastancyi vyrašyli demantavać i pieranieści ich na novaje miesca. Haścinica da hetaha času nie dabudavanaja.
