Viarchoŭny sud 18 krasavika pryniaŭ rašeńnie nie zadavalniać skarhu na admovu Ministerstva justycyi ŭ rehistracyi partyi «Biełaruskaja chryścijanskaja demakratyja» (BCHD). Pra heta paviedamiŭ adkazny sakratar arhkamiteta partyi Dzianis Sadoŭski.
Palityk nazvaŭ rašeńnie čakanym. «My nie spadziavalisia na spraviadlivy razhlad skarhi, bo nas nie rehistravali ŭžo bolš za 20 razoŭ, — skazaŭ jon. — Zrazumieła, što rašeńnie ab rehistracyi ci nierehistracyi BCHD źjaŭlajecca palityčnym i prymajecca na samym viersie. Suprać jaho čynoŭniki i sudździ iści nie rašajucca. My padavali skarhu, kab pakazać svaju niazhodu i palityčnyja matyvy nierehistracyi BCHD».
Sadoŭski taksama paviedamiŭ, što BCHD maje namier praciahnuć svaju pracu ŭ statusie arhkamiteta, pakul ažyćciaŭlać novuju sprobu rehistracyi nie płanuje. «Na hety momant u krainie ničoha nie mianiajecca, ułady ŭ pytańni rehistracyi palityčnych partyj znachodziacca na raniejšych pazicyjach. Tamu marnavać čas na čarhovuju sprobu rehistracyi ŭ najbližejšyja paru hadoŭ my nie budziem, kali tolki nie budzie kardynalnych źmien i nie źjaviacca realnyja šansy na rehistracyju», — skazaŭ Sadoŭski.
Ustanoŭčy źjezd BCHD adbyŭsia 12 śniežnia 2015 hoda ŭ Minsku. Na dumku Miniusta, pry stvareńni arhanizacyi «byli dapuščany hrubyja parušeńni zakanadaŭstva Respubliki Biełaruś». Jak paviedamlaŭ sajt Miniusta, «u chodzie vybaračnaj pravierki šerah hramadzian, ukazanych u liku zasnavalnikaŭ partyi, zajavili ab tym, što nie majuć da partyi nijakaha dačynieńnia i nie ŭdzielničali ŭ jaje stvareńni, nie stavili svaich podpisaŭ u śpisie zasnavalnikaŭ. Asobnyja hramadzianie ŭ śpisie zasnavalnikaŭ byli ŭkazany nieadnarazova, a ŭ dačynieńni da šerahu inšych zasnavalnikaŭ partyi byli paznačany nie adpaviednyja rečaisnaści źviestki». Arhkamitet, zajavili ŭ Miniuście, parušyŭ taksama patrabavańnie ab tym, što ŭ jakaści zasnavalnikaŭ palityčnaj partyi majuć prava vystupać tolki hramadzianie Respubliki Biełaruś.
Arhkamitetu BCHD admoŭlena ŭ rehistracyi partyi šeść razoŭ. Pieršy ŭstanoŭčy źjezd partyi prajšoŭ u 2009 hodzie, u 2010-m — jašče dva. Čaćviortaja sproba rehistracyi partyi była zroblena ŭ śniežni 2011-ha, a piaty ŭstanoŭčy źjezd adbyŭsia 13 červienia 2015 hoda. Adznačym, što chryścijanskija demakraty Biełarusi nie adnojčy sprabavali zarehistravacca taksama ŭ jakaści roznych rehijanalnych i respublikanskich hramadskich abjadnańniaŭ.
Raniej chryścijanskija demakraty zajaŭlali pra namier padać zajaŭku na ŭklučeńnie ŭ Knihu rekordaŭ Hiniesa pa kolkaści admoŭ u rehistracyi.
U sakaviku 2011 hoda ŭ intervju The Washington Post Alaksandr Łukašenka zajaviŭ, što BCHD, «vierahodna, nikoli nie budzie zarehistravanaja». «Jany ŭdzielničali ŭ biesparadkach. Jany nie chryścijanskija demakraty, jany bandyty», — skazaŭ jon.
