Da 30 krasavika ŭ minskaj Halerei sučasnaha mastactva «Ŭ» prachodzić piaty adukacyjna-mastacki fest «ARTES LIBERALES», tema jakoha — «Paetyka pracy». Sioletni vypusk foruma adkryŭsia vystavaj niamieckich mastakoŭ Ancie Eman i Charuna Faroki «Praca adnym kadram»; prajektam, jaki pradstaŭlaŭ Hiermaniju na 55-aj Vieniecyjanskaj bijenale. Ahułam ža prahrama festu ŭklučaje 50 lekcyj, dyskusij, varštataŭ, kinaprahladaŭ i kancertaŭ, tym albo inšym čynam datyčnych temy pracy.
Jakija sacyjalnyja vymiareńni ŭklučaje ŭ sabie praca? Što jość «prekarnaj» pracaj siońnia? Što — prymusovaj — siońnia i ŭčora? Jak abaranić svaje pravy fryłansieru, tvorčamu rabotniku? «ARTES LIBERALES-2016» prapanoŭvaje šerah vystupleńniaŭ i abmierkavańniaŭ z udziełam biełaruskich i zamiežnych ekśpiertaŭ na nadzionnuju siońnia temu transfarmacyj pracy. U lik mierapryjemstvaŭ uvachodziać nie tolki «kruhłyja stały», ale i lekcyi-kansultacyi, vorkšopy, dyskusii z pryciahnieńniem śpiecyjalistaŭ, to bok, padziei, jakija praduhledžvajuć i vychad na praktyčnyja zachady.
Da prykładu, 29 krasavika projdzie abmierkavańnie z udziełam psichołahaŭ, psichaterapiejtaŭ i koŭčieraŭ « Prafiesijnaje vyharańnie i stres na pracy: psichałahičnaja dapamoha ŭ epochu dedłajnaŭ» — prablema, jakaja chvaluje siońnia, napeŭna, amal kožnaha (tvorčaha) rabotnika.
Spałučeńnie analizu sučasnaj situacyi na rynkie pracy, «hłabalnyja» paraleli, pošuk rašeńniaŭ z udziełam supolnaści — taki tvorčy składnik fiestyvalu hetaha hoda, i jon praduhledžvaje vychad na bolš šyrokuju aŭdytoryju.
My vybrali niekalki padziejaŭ fiestyvalu, jakija mohuć zacikavić čytačoŭ NN.
19 krasavika mastak i piśmieńnik Alaksiej Tałstoŭ zaprašaje na «nieakademičnuju» dyskusiju pra mastactva i ekanomiku — «Chto nabudzie maje pierakanańni?».
20 krasavika Hiułaj Hiun z Hamburhskaha muzieju pracy prezientuje dakład na temu «Vystava «Prymusovaja praca. Niemcy, prymusovyja rabočyja i vajna» ŭ Muziei pracy ŭ Hamburhu». Raspracavanaja Fondam miemaryjalnych kompleksaŭ Buchienvald i Mitelbaŭ-Dora pry padtrymcy Fonda «Pamiać, adkaznaść i budučynia», heta vystava ŭpieršyniu raspaviadaje poŭnuju historyju prymusovaj pracy ŭ čas nacyjanał-sacyjalizma i jaho nastupstvaŭ.
22 krasavika temu prymusovaj pracy praciahnie varštat «Reframing Forced Labour» z udziełam Fieliksa Akiermana (Hiermanija\Polšča), Hiułaj Hiun, Imkie Chanzien (Šviecyja) i dyskusija «Pamiž pamiaćciu i zabyćciom», da jakoj, aproč hetych ekśpiertaŭ, dałučacca biełaruskija historyki Iryna Ramanava, Iryna Kaštalan. Hety vorkšop, jaki abjadnaŭ vučonych ź Biełarusi, Polščy, Šviecyi i Hiermanii, maje metaj praviadzieńnie dyskusii pa naviejšych daśledavańniach prymusovaj pracy z fokusam na biełaruski vopyt: «kalektyvizacyja», adaptacyja byłych prymusovych rabočych da žyćcia ŭ Savieckaj Biełarusi…
22 krasavika taksama Julija Łysakoŭskaja daść lekcyju na temu «Pravavoje rehulavańnie pracy ŭ śfiery tvorčych prafiesij».
U druhoj pałovie krasavika adbudziecca jašče niekalki cikavych lekcyj i dyskusij pa historyi, histaryčnaj i industryjalnaj spadčynie Biełarusi, dy losach post-savieckich haradoŭ.
26 krasavika, aŭtorak.
18.00 Lekcyja Andreja Čarniakieviča «Ad Tyzienhauza da Brežnieva: miesca «čałavieka pracy» ŭ haradskoj prastory Hrodna»
19.30 Lekcyja Siarhieja Chareŭskaha «Pryhažość karysnaha: stylistyčnyja asablivaści pramysłovaj architektury Biełarusi d.p. XIX-p.XX stst.»
27 krasavika, sierada.
18.00 Achova i interpretacyja industryjalnaj spadčyny. Prezientacyja prajektaŭ. U. Karcialova, Ł.Marcinkova, P. Skurko.
19.30 Kruhły stoł «Industryjalnaja spadčyna Biełarusi». S. Chareŭski, Ł. Kištymaŭ, A. Čarniakievič, S. Sturejka, N. Čarapan, A.Karpieka.
28 krasavika, čaćvier
18.00 Prezientacyja prajekta «Visahinas: Urbanizm paśla jadziernaj enierhii» (Biendžamin Koŭp, Viktoryja Stałybka).
Akramia akademičnych i mastackich dyskusij, stałaje miesca na Artes Liberales zajmajuć kinaprahlady, a taksama muzyka - bo heta adno ź siami kłasičnych «volnych mastactvaŭ» (łat. Artes liberales).
24 krasavika ŭ Halerei «Ŭ» vystupić biełaruski post-rock/electronic hurt Hamlet His Highness, naminavany na muzyčnuju premiju Experty.by.
30 krasavika, na zakančeńni festu, muzyki z hurta «NahUal» - Leanid Paŭlonak i Ben Koŭp (darečy, kuratar urbanistyčnaj prahramy festu) vystupiać z žyvym muzyčnym supravadžeńniem da chranikalnych filmaŭ pra pracu.
U hety ž dzień adbudziecca dyskusija pra arhanizacyju muzyčnych fiestyvalaŭ z udziełam pradstaŭnikoŭ biełaruskich festaŭ FSP, Mental Force, Mirum Music Festival, «Biełaje lustra», Vulica Brazil, dy inš.
Uvachod na ŭsie padziei festa volny!
Poŭnuju prahramu Artes Liberales 2016 možna pahladzieć na sajcie artes-liberales.by
Fiestyval Artes Liberales 2016 inicyjavany kamandaj vykładčykaŭ, vypusknikoŭ i studentaŭ Departamientu miedyja EHU, ale siarod niekalkich dziasiatkaŭ udzielnikaŭ nie tolki vykładčyki z hetaha ŭniviersiteta, ale i daśledčyki, mastaki i muzyki ź Biełarusi, Litvy i inšych krain Jeŭropy.
Artes Liberales štohod pašyraje supracoŭnictva z tvorčymi supołkami Biełarusi i za miažoj, tamu, akramia stałych partnioraŭ - Jeŭrapiejskaha Humanitarnaha Ŭniviersitetu dy Halerei «Ŭ» sioleta festu dapamahaje mastacki časopis pARTisan, płatforma pierfarmatyŭnych praktyk zJernie, muzyčny łejbł Foundamental Network, veb-časopis 34MAG.net, Łabaratoryja Vizualnych i kulturnych daśledvańniaŭ (Litva), Ambasada Francuzskaj Respubliki ŭ Respublicy Biełaruś, veb-studyja Laisves Studio (Litva), i minskaja muzyčna-kulturnaja inicyjatyva UNISEX. Vystava «Praca adnym kadram» i spadarožnyja lekcyi i dyskusij arhanizavanyja pry padtrymcy pradstaŭnictva Goethe Institut u Minsku.
