Atmaśfiera na parłamienckich vybarach 2016 hoda «pavinna być ni ŭ jakim razie nie horšaj», čym na prezidenckich vybarach minułaha hoda, zajaviła staršynia Centrvybarkama Lidzija Jarmošyna, vystupajučy 20 krasavika na sieminary pa pytańniach udziełu RHA «Biełaja Ruś» u kampanii pa vybarach deputataŭ Pałaty pradstaŭnikoŭ.
U pryvatnaści jana źviarnuła ŭvahu na nieabchodnaść zabieśpiačeńnia dastupnaści miescaŭ dla praviadzieńnia zboru podpisaŭ i sustreč z vybarščykami.
«Miascovyja vykanaŭčyja orhany pavinny zaćvierdzić rašeńni, jakimi vyznačyć miescy, zabaronienyja dla ŭstanoŭki pikietaŭ dla zboru podpisaŭ. Hetych zabaronienych miescaŭ pavinna być jak maha mienš. I ni ŭ jakim razie nie moža być ahulnych farmulovak u pieraliku takich miescaŭ, — skazała jana. — Čamu nielha na vuličnych prypynkach, dzie ž jašče źbirać podpisy? Usie drakonaŭskija rašeńni stvarajucca ŭ tych haradach i vioskach, dzie pikietu nikoli nie bačyli naohuł, nie ŭjaŭlajuć, što heta takoje, ale na ŭsialaki vypadak zaścierahajucca».
«Hetaha nie pavinna być. Čym bolš zabaronaŭ, tym bolš parušeńniaŭ i sposabaŭ pieraadoleć ich», — padkreśliła kiraŭnik CVK.
Miascovyja ŭłady, adznačyła Jarmošyna, taksama pavinny pryniać rašeńni ab miescach dla praviadzieńnia pieradvybarnych schodaŭ i sustreč, dzie dziejničaje paviedamlalny, a nie zajaŭny paradak.
«Naturalna, takich miescaŭ pavinna być dastatkova i nie na vysiełkach. Byli vypadki, kali ŭ horadzie stadyjon i dom adpačynku na ŭskrainie, mała naviedvalnyja ci ŭ stadyi rekanstrukcyi, i ich adnosiać da miescaŭ praviadzieńnia sustreč z vybarščykami. Heta prosta ździek», — skazała Jarmošyna.
Pry hetym jana panarakała i na pasiŭnaść kandydataŭ u deputaty. Tak, zaznačyła kiraŭnik CVK, u 2012 hodzie tolki 60% kandydataŭ u deputaty apublikavali svaje pieradvybarčyja prahramy ŭ ŚMI, pryčym pa Minsku hetaja ličba skłała 33%. «Chiba heta pieradvybarnaja baraćba? Navat toje, što dajecca biaspłatna, nie vykarystoŭvajecca», — zaznačyła jana.
