Siońnia hazieta Administracyi prezidenta «Sovietskaja Biełoruśsija» ahučyła infarmacyju, što zatrymańnie bajca «Azova» Stasia Hančarova adbyvałasia pry sadziejničańni ŭkrainskaha boku. My paprasili prakamientavać hetuju infarmacyju siabra hramadskaj rady pry Kamitecie zamiežnych spravaŭ Viarchoŭnaj Rady Ukrainy, biełarusa Ihara Ščakareviča.
«Ja pierakanany, što, jak minimum, niekatoryja vysokapastaŭlenyja pradstaŭniki śpiecsłužbaŭ Ukrainy pastajanna źlivajuć biełaruskim kaleham infarmacyju pra biełaruskich dobraachvotnikaŭ. Ale, dumaju, situacyja jašče horšaja, i supracoŭnictva pa hetamu pytańniu adbyvajecca na vyšejšym uzroŭni pamiž kiraŭnictvam śpiecsłužbaŭ dvuch krainaŭ.
Adnak prosta ŭziać i ekstradavać biełaruskich bajcoŭ Ukraina nie moža, pakolki padymiecca chvala abureńnia ŭnutry krainy. Tamu ciapier my bačym, što ŭ Biełarusi aktyŭna «presujuć» tolki tych dobraachvotnikaŭ, jakija majuć za saboj nie vielmi pryjemny šlejf u bijahrafii.
Na prykładzie Hančarova i Avatarava biełaruskamu hramadstvu, u tym liku i demakratyčnaj jaho častcy, chočuć ubić u hałovy, što biełaruskija dobraachvotniki — heta admarozki i nacysty. Kali ž heta budzie zroblena, to voźmucca za inšych biełaruskich dobraachvotnikaŭ, jakija vajavali za Ukrainu i jakija znachodziacca na terytoryi Biełarusi.
Z-za šerahu pryčynaŭ u presu nie traplaje infarmacyja, što praktyčna ŭsie biełarusy, jaki vajavali za Ukrainu i viarnulisia na Radzimu, znachodziacca pad kaŭpakom — u ich doma byli praviedzienyja pieratrusy, a sami jany znachodziacca pad padpiskaj pra niavyjazd.
Zadača hramadzianskaj supolnaści ŭ Biełarusi i biełaruskaj dyjaspary va Ukrainie — abaranić hetych chłopcaŭ. Kali my ich nie abaronim, to zaŭtra jany nie zmohuć abaranić nas».
