Novy zakon zabaraniaje vykarystoŭvać imiony z rasiejskimi kančatkami «-oŭ», «-ova», «-ovič» i «-oŭna».
Žychary Dušanbe. Fota silkroadreporters.com
Orhany rehistracyi Tadžykistanu pierastanuć rehistravać imiony z rasiejskimi kančatkami «-oŭ», «-ova», «-ovič» i «-oŭna». Rašeńnie pryniali paśla ŭniasieńnia papravak u zakon ab Rehistracyi aktaŭ hramadzianskaha stanu, raspavioŭ Džałalidzin Rachimaŭ, namieśnik kiraŭnika ZAHS.
«Pavodle hetaha zakonu proźviščy buduć farmavacca pry dapamozie tadžykskich kančatkaŭ «-zad», «-zada», «-ӣ», «-ijon», «far». Heta karennyja tadžykskija kančatki. Naprykład, Karymzad, abo Karymzada. Ale kančatak «-zad» nie źjaŭlajecca prymusovym, hramadzianie mohuć vybrać dla svajho proźvišča takija kančatki, jak «-pur», — dadaŭ jon.
Pa słovach Rachimava, žychary z «rasiejskimi» imionami i proźviščami nie abaviazanyja ich mianiać. Adnak pry nieabchodnaj źmienie dakumentaŭ, da proźviščaŭ buduć dadavać tadžykskija kančatki niezaležna ad žadańnia čałavieka. Novanarodžanych taksama buduć nazyvać vyklučna tadžykskimi imionami.
«My tłumačym, što meta — tadžykizacyja proźviščaŭ, jany (ludzi) razumiejuć. Kali sytuacyja nia źmienicca, to praz 10 hadoŭ našy dzieci padzielacca na dźvie hrupy, adna budzie hanarycca svaimi tadžykskimi imionami, inšaja — budzie nasić čužyja. My pavinny mieć nacyjanalnyja i patryjatyčnyja pačućci», — zajaviŭ čynoŭnik.
Miniust Tadžykistana jašče ŭ krasaviku 2015 hodu vystupiŭ ź inicyjatyvaj unieści źmieny ŭ zakon respubliki «Ab dziaržaŭnaj rehistracyi aktaŭ hramadzianskaha stanu».
Da jaho raspracavali adziny rejestar tadžykskich imionaŭ. Etničnym tadžykam zabaranili nazyvać dziaciej imionami, «čužymi nacyjanalnaj kultury»: nazvami pradmietaŭ, praduktaŭ, žyvioł i ptušak, što prynižajuć honar i hodnaść čałavieka. Pad zabaronu taksama trapili arabskija imiony i imiony, jakija padzialajuć ludziej na kasty, naprykład, «muła», «šajch», «tura». Za pradstaŭnikami nie karennych etnasaŭ pakinuli prava nazyvać dziaciej pa svaim žadańni.
Prezydent Tadžykistana jašče viasnoj 2007 hoda zaklikaŭ skasavać rasiejskija kančatki. Tady ž Emamali Rachmonaŭ źmianiŭ proźvišča na Rachmon. Prykład prezydenta paŭtaryli šmatlikija čynoŭniki.
