Mihiel Aryas Kańjete
Fota: Heinz-Peter Bader / Reuters
Realizacyja prajektu «Paŭnočny patok — 2» źmienić stanovišča z raźmierkavańniem hazu ŭ Jeŭropie, pastavić pad pahrozu zabieśpiačeńnie hazam Polščy i pazbavić Ukrainu statusu tranziciora paliva. Z takim papiaredžańniem, jak paviedamlaje «Interfaks», vystupiŭ jeŭrakamisar pa enierhietycy Mihiel Aryas Kańjete.
«U Rasiei źjavicca pieravažnaja zdolnaść pastavak u Jeŭropu, i adbudziecca pamianšeńnie maršrutaŭ ad troch da dvuch. Da taho ž pad pahrozaj akažacca zabieśpiačeńnie Polščy. Skaračeńnie maršrutaŭ, viadoma, nie palepšyć biaśpieku zabieśpiačeńnia», — skazaŭ Kańjete.
Novy hazapravod, jak miarkuje jeŭrakamisar, taksama pahoršyć kankurentnaje asiarodździe na paliŭnym rynku ŭ krainach Centralnaj i Uschodniaj Jeŭropy, što supiarečyć Treciamu enierhapakietu.
Akramia taho, Kańjete vykazaŭ aściarohu ŭ suviazi z tym, što Ukraina, jakaja, na jaho dumku, ryzykuje pazbavicca statusu nadziejnaha tranziciora paliva, budzie vymušana zaklučyć novy kantrakt z Rasiejaj na pastaŭki hazu. «U intaresach usich partnioraŭ, asabliva krain Centralnaj i Uschodniaj Jeŭropy, Ukraina pavinna zastavacca važnym hazatranspartnym kalidoram (…). Paśpiachovaja implemientacyja zimovaha hazavaha pakieta pry kanstruktyŭnym udziele Rasiei i Jeŭrakamisii dała mahčymaść zabiaśpiečyć miascovaje spažyvańnie na Ukrainie i harantavać nadziejny tranzit rasijskaha hazu ŭ Jeŭrasajuz», — pryvodzić słovy čynoŭnika TASS.
4 maja dziaržsakratar ZŠA Džon Kiery vykazaŭ zaniepakojenaść prajektam budaŭnictva hazapravoda «Paŭnočny patok — 2» i zajaviŭ, što hety hazapravod akaža niehatyŭny ŭpłyŭ na Uschodniuju Jeŭropu. U kancy sakavika Vašynhton nazvaŭ prajekt pahrozaj enierhabiaśpieki Jeŭrasajuza.
Pahadnieńnie akcyjanieraŭ pa prajekcie «Paŭnočny patok — 2», majecca na ŭvazie pašyreńnie «Paŭnočnaha patoku», było padpisana ŭ vieraśni 2015 hoda ŭ ramkach Uschodniaha ekanamičnaha forumu va Uładzivastoku. U skład novaha kansorcyuma ŭvajšli «Hazprom», E.ON, Shell, BASF/Wintershall, OMV i Engie. Dźvie novyja nitki ahulnaj hadavoj mahutnaściu 55 miljardaŭ kubamietraŭ projduć ad rasijskaha ŭźbiarežža pa dnie Bałtyjskaha mora da Hiermanii. Uvod trubapravoda ŭ ekspłuatacyju zapłanavany na čaćviorty kvartał 2019 hoda.
Jak čakajecca, «Hazprom» pačnie budaŭnictva hazapravoda «Paŭnočny patok — 2» 1 krasavika 2018 hoda.
Suprać realizacyi prajekta vystupaje šerah ŭschodniejeŭrapiejskich krain. U sakaviku paviedamlałasia, što pradstaŭniki vaśmi krain-členaŭ ES (Čechija, Estonija, Vienhryja, Łatvija, Polšča, Słavakija, Rumynija i Litva) padpisali list staršyni Jeŭrakamisii Žanu-Kłodu Junkieru, u jakim vykazali niehatyŭnaje staŭleńnie da «Paŭnočnaha patoku — 2» i paviedamili pra ryzyki, jakija jon niasie dla enierhietyčnaj biaśpieki ŭ Centralnaj i Uschodniaj Jeŭropie. Krytykujuć prajekt i ŭ ZŠA.
