Štohod va ŭsim śviecie ździajśniajecca kala 56 młn abortaŭ, ale ŭ raźvitych krainach ich kolkaść źniziłasia da histaryčnaha minimumu, śviedčyć navukovaje daśledavańnie, apublikavanaje časopisam Lancet.
Kali ŭ 1990 hodzie na tysiaču žančyn u bahatych krainach pravodziłasia 46 abortaŭ, to ŭ 2014 hodzie — tolki 27 abortaŭ.
Na dumku navukoŭcaŭ, skaračeńnia kolkaści abortaŭ udałosia damahčysia hałoŭnym čynam dziakujučy dastupnaści srodkaŭ kantracepcyi.
Tym časam u krainach, jakija raźvivajucca, kolkaść abortaŭ zastajecca na adnym uzroŭni — kala 37 abortaŭ na tysiaču žančyn, pryčym, jak śviedčyć statystyka, kryminalizacyja abortaŭ praktyčna nijak nie adbivajecca na ich kolkaści, bo žančyn, jakija imknucca pazbavicca ad ciažarnaści, nie spyniajuć supraćzakonnyja pracedury.
Pieršaje hłabalnaje daśledavańnie statystyki abortaŭ u śviecie finansavałasia Vialikabrytanijaj, Hałandyjaj, Narviehijaj, a taksama niekalkimi arhanizacyjami z ZŠA.
Daśledčyki pryjšli da vysnovy, što kožnaja čaćviortaja ciažarnaść u śviecie zakančvajecca abortam. Pry hetym try čverci abortaŭ ździajśniajecca zamužnimi žančynami.
Terytaryjalna bolš za ŭsio abortaŭ ździajśniajecca na astravach Karybskaha basiejna (65 na tysiaču žančyn), mienš za ŭsio - u Paŭnočnaj Amierycy (17 na tysiaču). Samaha imklivaha prahresu ŭdałosia damahčysia krainam Uschodniaj Jeŭropy, dzie kolkaść abortaŭ ŭdałosia skaracić z 88 da 42 na tysiaču žančyn.
Pa dadzienych daślednikaŭ, u krainach, jakija raźvivajucca, kala 225 młn žančyn naohuł nie majuć dostupu da srodkaŭ kantrolu za naradžalnaściu.
