Supracoŭniki adździeła kryminalnaha vyšuku kryminalnaj milicyi ŭpraŭleńnia ŭnutranych spraŭ administracyi Frunzienskaha rajona Minska zatrymali minčuka 1992 hoda naradžeńnia, jaki padazrajecca ŭ vymańvańni $10 tysiač u zakachanaj u jaho dziaŭčyny. Pra heta paviedamiła pres-aficer Frunzienskaha RUUS stalicy Natalla Askirka.
Fihurant i paciarpiełaja paznajomilisia na karparatyvie ŭ transpartnaj kampanii, dzie razam pracavali. U ich zaviazalisia praciahłyja ramantyčnyja adnosiny, jakija dziaŭčyna ličyła surjoznymi. Jana ščyra kachała maładoha čałavieka i hatovaja była ŭsialak padtrymlivać jaho, u tym liku i finansava. Adnojčy chłopiec paprasiŭ u paciarpiełaj $4 tysiačy nibyta dla taho, kab pahasić sudzimaść. Inšym razam jon pazyčyŭ u dziaŭčyny hrošy na lačeńnie ad narkamanii. Padazravany źviartaŭsia pa finansavuju dapamohu da paciarpiełaj i paśla vydumanaj svarki z baćkam i maci, jakija nibyta vyhnali jaho z chaty, a potym prasiŭ hrošy na pachavańnie baćkoŭ, jakija na samaj spravie byli žyvyja i zdarovyja. U ahulnaj kolkaści dziaŭčyna pieradała fihurantu $10 tysiač, a nieŭzabavie zrazumieła, što małady čałaviek nie maje da jaje nijakich ciopłych pačućciaŭ.
Paralelna jon šmat braŭ u doŭh u svaich kaleh i afarmlaŭ na ich imia kredyty na mabilnyja telefony i bytavuju techniku. U ciapierašni čas u milicyju źviarnulisia troje padmanutych hramadzian.
U dačynieńni da minčuka raspačataja kryminalnaja sprava pa č.4 art.209 KK (machlarstva). Jamu pahražaje pazbaŭleńnie voli terminam da 10 hadoŭ. Raniej fihurant užo byŭ sudzimy za zachoŭvańnie psichatropnych rečyvaŭ i machlarstva.
