Jeŭrapiejskaja kamisija abaviazała siem futbolnych kłubaŭ Ispanii viarnuć u ahulnaj kolkaści 70 miljonaŭ jeŭra, atrymanych u vyhladzie dziaržaŭnaj dapamohi.
Rašeńnie tyčycca kłubaŭ «Barsiełona», «Reał», «Valensija», «Atletyk Bilbaa», «Asasuna», «Elče i «Erkules», jakija atrymlivali ad urada lhotnyja kredyty i na hetyja srodki kuplali nieruchomaść.
Jeŭrapiejskija rehulatary pryjšli da vysnovy, što atrymańnie futbolnymi kłubami dziaržpadtrymki z boku dziaržavy zabiaśpiečyła im kankurentnuju pieravahu nad inšymi kamandami i parušyła jeŭrapiejskaje zakanadaŭstva.
Žyllovaje budaŭnictva i apieracyi ź ziamielnymi ŭčastkami — adna z samych važnych krynic dachodu ispanskich futbolnych kłubaŭ.
Tolki adna ŭhoda ź nieruchomaściu ŭ ispanskaj stalicy pryniesła samomu bahatamu ŭ śviecie futbolnamu kłubu — madrydskamu «Reału» — 18,4 miljonaŭ jeŭra prybytku, jakija jon ciapier pavinien viarnuć u kaznu.
Kamisar ES pa pytańniach kankurencyi Marhrete Viestahier zajaviła, što, zajmajučysia samafinansavańniem, kamandy niesumlenna vykarystoŭvali hrošy padatkapłacielščykaŭ.
Na fonie šmatmiljonnych vydatkaŭ na kuplu hulcoŭ i tranśfiernyja ŭhody, jakija mohuć sabie dazvolić viadučyja ispanskija futbolnyja kłuby, suma vypłat, jakoj ich abkłała Jeŭrakamisija, vyhladaje adnosna nievialikaj.