Amierykanski juryst Emanuił Zielcer, jaki znachodzicca pad śledstvam pa spravie ab vykarystańni padrobnych dakumientaŭ hrupaj asob, padazrajecca ŭ niezakonnym zachoŭvańni i kantrabandzie narkatyčnych srodkaŭ.
Jak paviedamiŭ BiełaPAN jaho advakat Dźmitryj Haračka, 27 maja była raspačata kryminalnaja sprava pa č. 1 art. 328 Kryminalnaha kodeksa (niezakonnaja pieravozka i zachoŭvańnie narkatyčnych srodkaŭ) i č. 2 art. 228 (kantrabanda narkatyčnych srodkaŭ). Zielcer padazrajecca ŭ niezakonnaj transparciroŭcy lekaŭ, jakija ŭtrymlivajuć narkotyki. Zhodna z praviłami, pry ŭjeździe ŭ Biełaruś jamu nieabchodna było ŭkazać ich u mytnaj dekłaracyi.
Advakat zaznačyŭ, što hetaja sprava nie maje statusa dziaržaŭnaj tajny.
Nahadajem, Zielcer i jaho sakratar rasijanka Uładlena Funk byli zatrymanyja 12 sakavika KDB Biełarusi. Ich abvinavacili ŭ vykarystańni zaviedama padrobnych dakumientaŭ hrupaj asob. Padrabiaznaści aryštu aficyjna nie kamientujucca, pakolki sprava maje status dziaržaŭnaj tajny.
E. Zielcer — advakat hramadzianina ZŠA Džozefa Kieja, jaki źjaŭlajecca dalokim svajakom viadomaha hruzinskaha biźniesmiena Badry Patarkacyšvili. Paśla śmierci 13 lutaha Patarkacyšvili Dž. Kiej pradjaviŭ dakumienty, zhodna ź jakimi jon pryznačany vykanaŭcam testamientu pamierłaha. Dakumienty byli składzieny E. Zielceram, adnak svajaki Patarkacyšvili abjavili ich padrobkaj, paśla čaho Zielcer i byŭ zatrymany ŭ Minsku.
14 maja sud Tbilisi paćvierdziŭ sapraŭdnaść dakumientaŭ, pryznaŭšy takim čynam Dž. Kieja rasparadčykam spadčyny B. Patarkacyšvili.
Dziarždepartamient ZŠA niekalki razoŭ źviartaŭsia da biełaruskich uładaŭ z prośbaj vyzvalić Zielcera na humanitarnych padstavach — za čas utrymańnia pad vartaj u Biełarusi ŭ jaho na fonie šmatlikich chvarob surjozna pahoršyŭsia stan zdaroŭja.
