«Salidarnaść» daviedvałasia, jak maładyja i pryvabnyja biełaruski stanoviacca pałaniankami ŭ Kitai.
U lipieni HUUS Minharvykankama azadačyła infarmacyjaj pra toje, što za pieršaje paŭhodździe 2016 hoda ŭ Kitai zatrymali dziesiać dziaŭčat-nielehałak, a niekatoryja ź ich navat apynulisia za kratami. Pa słovach ekśpiertaŭ, znajomych ź situacyjaj, prablemnyja vypadki rehularna adbyvajucca ź biełaruskami ŭ Kitai i daloka nie abmiažoŭvajucca tymi, pra jakija zajaŭlaje milicyja.
U pryvatnaści «Salidarnasci» stała viadomaja historyja, jakaja adbyłasia ŭ 2016 hodzie ź biełaruskaj dziaŭčatami, jakija źjechali pracavać u adzin z kitajskich kłubaŭ.
— Kali jany tudy pryjechali, to ci nie zdahadvalisia, ci nie viedali pra toje, što nielha pracavać pa turystyčnaj vizie, — raspaviała padrabiaznaści kiraŭnik infalinii pa biaśpiečnym vyjeździe za miažu prahramy «Ła Strada» Iryna Varvaryna. — Im skazali, što nieabchodna addać pašpart dla pieraafarmleńnia turystyčnaj vizy na pracoŭnuju. Dziaŭčyny tam znachodzilisia niejki čas, paśla čaho niekatoryja ź ich vyrašyli spynić adnosiny z pracadaŭcam — i im udałosia paśpiachova źjechać. A adna dziaŭčyna vyrašyła tam zastacca.
Kali biełaruska zrazumieła, što jaje turystyčnaja viza padyšła da kanca, to akazałasia, što źjechać z Kitaja nie tak i prosta, tak jak jaje pašpart pa-raniejšamu znachodziŭsia ŭ pracadaŭcy.
— Jaje karmili abiacankami, što zapłaciać hrošy i viernuć pašpart, — praciahnuła surazmoŭca «Salidarnasci». — U vyniku dziaŭčyna praterminavała vizu. Naturalna, ni pra jakoje pieraafarmleńnie turystyčnaj vizy na pracoŭnuju razmova nie išła. Dziaŭčynu prosta padmanuli: joj nieabchodna było viartacca dadomu, ale nie było hrošaj. Zvarotnaha kvitka jana kupić nie mahła, a situacyja jašče ŭskładniałasia tym, što kožny dzień praterminoŭki vizy joj kaštavała, pavodle kitajskaha zakanadaŭstva, ad 80 dalaraŭ.
Situacyju ŭdałosia vyrašyć tolki kali brat dziaŭčyny, jaki znachodziŭsia ŭ Biełarusi, źviarnuŭsia na haračuju liniju, śpiecyjalisty jakoj zanialisia prablemaj. Pry padtrymcy biełaruskaha konsulstva ŭ Kitai ŭdałosia viarnuć biełarusku dadomu.
— Hety vypadak pakazalny. Takich historyj šmat, ale nie zaŭsiody jany skančajucca hetak radasna, — adznačaje Iryna Varvaryna. - Časta byvaje tak, što pracadaŭca pačynaje pahražać, kazać, maŭlaŭ, ty tut znachodzišsia nielehalna i jašče pavinna mnie za žyllo. Byvaje tak, što zapałochvajuć i patrabujuć pryvieźci zamiest siabie traich inšych dziaŭčat. Takija vypadki ŭžo byli, i adnu dziaŭčynu ŭ Biełarusi sud aštrafavaŭ za viarboŭku dla pracy ŭ Kitai.
Na pytańnie, navošta maładyja dziaŭčaty ź Biełarusi jeduć na zarobki ŭ daloki Kitaj, ekśpiert adkazvaje:
— Asnoŭny matyŭ — heta hrošy. Zarobak tam usio ž trochi vyšejšy za siaredni zarobak u Biełarusi (dla dziaŭčat, jakija ŭ kłubach źjaŭlajucca supravadžalnicami, tancorkami abo chostes). Plus kitajcy lubiać karaokie, tamu dziaŭčaty časta śpiavajuć. A naohuł kłub u Kitai ličycca prestyžnym, kali tam jość pryhožyja biełyja jeŭrapiejskija žančyny. Im dosyć siadzieć pobač z kitajcami i ŭžyvać napoi. Tamu i biełarusak tam šmat, i ŭkrainak — typaž našych žančyn zapatrabavany. Jany kantaktnyja, jany pryhožyja.
Pry hetym čaściej za ŭsio ŭ kitajskija kłuby jeduć dziaŭčaty ź nievialikich biełaruskich haradoŭ.
— Kali raboty ŭ vioscy ci maleńkim horadzie prosta niama. Abo kali jość tolki zarobak nastaŭnicy abo sacyjalnaha rabotnika, to zrazumieła, što prapanavanyja im sumy vyhladajuć jak vialikija hrošy. Niekatoryja dziaŭčaty šukajuć lepšaj doli — im chočacca pryhoža žyć.
Pry hetym Iryna Varvaryna zaklikaje biełarusak zaŭsiody dobra analizavać prapanovy ab pracy za miažoj, kab nie apynucca ŭ liku tych šmatlikich padmanutych i navat zatrymanych za parušeńni dziaŭčat.
— Treba pamiatać, što ŭ Kitai zabaroniena pracavać pa turystyčnaj vizie. Pieraaformić jaje na pracoŭnuju na terytoryi KNR niemahčyma. A praca biez pracoŭnaj damovy stavić vas u słabaje stanovišča, — papiaredžvaje surazmoŭca «Salidarnasci».
