Hramadzianka Rasija Maryja Rymar, zatrymanaja ŭ minskim aeraporcie za paviedamleńnie ab tratyle, aštrafavanaja na 25 bazavych vieličyniaŭ (525 novych rubloŭ) za niepadparadkavańnie patrabavańniam supracoŭnikaŭ milicyi. Takoje rašeńnie pryniaŭ 4 žniŭnia sud Kastryčnickaha rajona Minska.
Padčas pasiadžeńnia — čaćviortaha pa liku — Rymar davała tłumačeńni pa spravie. Jana paviedamiła, što supracoŭniki milicyi, jakija zatrymali jaje ŭ aeraporcie, nie nazvalisia i nie rastłumačyli pryčyny jaje zatrymańnia, nie začytali jaje pravy i abaviazki, čym, na jaje dumku, parušyli zakanadaŭstva ab orhanach unutranych spraŭ. Akramia taho, Rymar patłumačyła, što dziejničała ŭ metach samaabarony, kali adchinałasia ad supracoŭnika milicyi, jaki sprabavaŭ kanfiskavać u jaje pašpart i załomvaŭ ruku.
Pavodle słoŭ padsudnaj, jana dumała, što za 5-10 chvilin rastłumačyć milicyjanieru svaju pazicyju i vylecić z aeraporta.
Advakat Vadzim Mušynski zajaviŭ, što ŭ sudzie byli ŭstalavanyja abstaviny «nie zusim pravilnych pavodzin z boku supracoŭnikaŭ milicyi pry składańni administracyjnaha pratakoła», u pryvatnaści ŭ tym, što kožny supracoŭnik pry abmiežavańni pravoŭ i svabod hramadzianina abaviazany nazvać jamu padstavy dla takoha abmiežavańnia.
Na dumku advakata, u sudovym pasiadžeńni było ŭstanoŭlena, u tym liku z pakazańniaŭ śviedak — milicyjanieraŭ, što nichto ź ich u momant zatrymańnia nie tłumačyŭ svaje dziejańni. «Rymar naohuł nie było zrazumieła, za što jaje źniali z rejsa: abo z-za toj frazy, jakuju jana skazała, abo z pryčyny niejkaha kanfliktu z supracoŭnikami aeraporta», — zajaviŭ advakat. Jon źviarnuŭ uvahu na toje, što milicyjaniery pry zatrymańni «nie znajšli čas navat nazvać siabie». Jak ličyć Mušynski, padstaŭ dla jaje administracyjnaha pieraśledu niama.
Sud nie ŭziaŭ hetyja dovady da ŭvahi i, uličvajučy ŭ jakaści źmiakčalnaj akaličnaści najaŭnaść u Rymar dvuch małaletnich dziaciej, pryznačyŭ štraf u 25 bazavych vieličyń pry maksimumie 50.
Paśla pasiadžeńnia Rymar paviedamiła, što maje namier abskardzić rašeńnie. Pavodle jaje słoŭ, papiaredniaje śledstva pa kryminalnaj spravie praciahvajecca. Termin jaho zakančeńnia pravaachoŭnyja orhany nie paviedamlajuć.
Juryst hramadskaha ŁHBT-ruchu «Aviers» z Samary Maryja Rymar, jakaja nakiroŭvałasia z Kijeva ŭ Maskvu tranzitam cieraź Biełaruś, była zatrymanaja ŭ minskim aeraporcie 7 lipienia. Paviedamlałasia, što jana niaŭdała pažartavała ŭ razmovie ź inśpiektaram słužby hramadskaj biaśpieki ŭ punkcie nadhladu pierad pasadkaj na rejs, zajaviŭšy, što ŭ jaje ŭ sumcy vybuchovaje rečyva. U dačynieńni da Rymar była raspačataja kryminalnaja sprava za łžyvaje paviedamleńnie ab niebiaśpiecy, a taksama administracyjnaja sprava za niepadparadkavańnie patrabavańniam supracoŭnikaŭ milicyi. Da 18 lipienia jaje ŭtrymlivali ŭ SIZA ŭ Minsku i Žodzina, zatym vypuścili pad zakład u 2,5 tys. denaminavanych rubloŭ. Na ŭvieś čas śledstva i razhladu spravy ŭ sudzie Rymar nie maje prava pakidać terytoryju Biełarusi.
Raniej Rymar paviedamiła, što infarmacyja ab tratyle u sumcy była nie žartam, a sprobaj paźbiehnuć nieabhruntavanaha, na jaje dumku, asabistaha nadhladu.
