Na adnym z najbujniejšych navinavych partałaŭ Rasii Lenta.ru źjaviŭsia čarhovy materyjał, u jakim krytykujecca biełaruskaje kiraŭnictva i stvarajecca ŭražańnie ŭzmacnieńnia niejkich rusafobskich arhanizacyj.
Na hety raz isteryku «Lenty» vyklikaŭ niadaŭni siužet ANT, u jakim pierakazvałasia rasśledavańnie «Našaj Nivy» pra vyvaz biełaruskich dziaciej na treniroŭki da nieanacystaŭ u Padmaskoŭje.
Lenta.ru cćviardžaje, što siužet ANT davoli śpiecyfičny: maŭlaŭ, u hetaj krainie dziaržaŭnyja miedyja abmiažoŭvajucca aśviatleńniem niepalityčnych tem i retranślacyjaj navin ad ahienctvaŭ, tamu demanstracyja takoha žorstkaha (pa biełaruskich mierkach) siužeta aznačaje tolki adno — zamovu z boku ŭładaŭ.
Pryvodziacca spasyłki na vykazvańni hałoŭnaha redaktara «Sovietskoj Biełoruśsii» Paŭła Jakuboviča, dzie toj krytykavaŭ kazackija letniki, a taksama publikacyja ŭ SB artykuła pra rasijskich nieanacystaŭ.
Śćviardžajecca, što ŭ Biełarusi admysłova abrali Milčakova na rolu pudziła.
«Samaje dziŭnaje — va ŭsich hetych siužetach praktyčna nie kažuć pra toje, što jość miascovyja nacyjanalisty i ich ułasnyja vajenna-patryjatyčnyja kłuby (naprykład, kłub «Vajar» i atrad «Pahonia»), dzie rychtujuć da viadzieńnia vajennych dziejańniaŭ i abaronie niezaležnaści Biełarusi ad Rasii», — vykazvaje zakłapočanaść aŭtar.
Jaho taksama aburaje toje, što vyjezdami dziaciej na vajennyja zbory ŭ Padmaskoŭje zacikaviłasia milicyja, pra što zajaviŭ sam ministr unutranych spraŭ.
«A miascovyja radykalnyja hrupoŭki, choć i znachodziacca pad peŭnym kantrolem KDB i MUS, praciahvajuć svaju dziejnaść całkam bieśpieraškodna», — praciahvaje viešać jarłyki «radykalnaści» Lenta.ru i šukaje tych, «kamu heta treba».
«Usio heta možna rastłumačyć niekalkimi pryčynami. Praz kryzis va Ukrainie miascovaje kiraŭnictva ŭpała ŭ tuju ž isteryju z nahody «mahčymaj rasijskaj ahresii», jakaja ŭłaścivaja ŭsioj Uschodniaj Jeŭropie. Nijakimi dovadami nie pierakanać kiraŭnictva krainy ŭ tym, što ŭsie aściarohi biezhruntoŭnyja i Maskva nie pahražaje ciapierašniamu palityčnamu režymu respubliki», — piša Lenta.ru, padkreślivajučy, što niama pahrozy nie niezaležnaści, a «ciapierašniamu palityčnamu režymu».
Taksama aŭtar prychodzić da vysnovy, što va ŭmovach padzieńnia ekanomiki vielmi vyhadna znajści ŭnutranaha voraha ŭ asobie nieanacystaŭ.
Z teksta vynikaje takaja dumka, što prablema vychavańnia dziaciej čarnasocienskimi prarasijskimi arhanizacyjami — nadumanaja i vyhadnaja ŭładam, bo dazvalaje stvaryć umovy dla hurtavańnia nacyi vakoł prezidenta pierad tvaram pahrozy.
