U Afhanistanie ŭ vyniku avijaŭdaru drona zabity lidar miascovaha padraździaleńnia ekstremisckaha ruchu «Isłamskaja dziaržava» Chafiz Said Chan, paviedamlajuć krynicy ŭ Pientahonie.
Chafiz Said Chan byŭ viadomy jak «emir» tak zvanaha «Emirata Charasan». Fota sajta tadžykskaj słužby «Radyjo Svaboda».
Letaś afhanskija śpiecsłužby ŭžo paviedamlali pra śmierć Saida Chana ŭ vyniku bambavańnia dronam, ale tady struktury ID abvierhli hetuju infarmacyju.
Apošniaje paviedamleńnie amierykanskich vajskoŭcaŭ taksama pakul nie paćvierdžana ź niezaležnych krynic.
U Pientahonie ŭdakładniajuć, što rakietny ŭdar pa tym miescy, dzie znachodziŭsia Said Chan, byŭ naniesieny 26 lipienia.
U toj dzień afhanskija vajennyja paviedamili ab maštabnaj apieracyi suprać ID u pravincyi Nanharchar, u vyniku jakoj, pavodle ich źviestak, zahinuli kala 120 bajevikoŭ. Adnak tady nie ŭdakładniałasia, ci byŭ siarod ich Said Chan.
Pieršapačatkova Chafiz Said Chan kamandavaŭ adnym z padraździaleńniaŭ «Talibanu», adnak potym prysiahnuŭ na viernaść «Isłamskaja dziaržava».
Sa studzienia 2015 hoda hetyja dva ekstremisckija ruchi znachodziacca ŭ Afhanistanie ŭ stanie adkrytaha supraćstajańnia: taliby zachoŭvajuć kantrol u mnohich rehijonach krainy, adnak ID paśpiachova rekrutuje ŭ svaje šerahi bajavikoŭ Talibanu, u tym liku ich palavych kamandziraŭ.
