18 žniŭnia barysaŭski BATE pravioŭ pieršy matč raŭnda płej-of Lihi Jeŭropy pa futbole. U stalicy Kazachstana naš kłub hulaŭ z «Astanoj».
Papiaredni vyjezd BATE ŭ Kazachstan byŭ taki, što horš i nie prydumaješ. U 2013 hodzie naš čempijon sastupiŭ u Karahandzie miascovamu «Šachcioru» i pakinuŭ Lihu čempijonaŭ. Ciapier častkova moža paŭtarycca taja ž historyja.
U BATE na hulniu nie vyjšaŭ ceły šerah futbalistaŭ: traŭmavanyja Miłunavič, Pik, Dubra, atruciŭsia Ihar Stasievič. Niekatoryja ź ich mahli vyjści, ale Jermakovič vyrašyŭ nie ryzykavać zdaroŭjem na štučnym pakryćci «Astany».
Kazachstancy vyjšli na hulniu bolš zaradžanymi. Jany hulali bolš šyroka i vostra. A jašče vielmi niebiaśpiečna — užo ŭ pieršym tajmie pole vymušany byŭ pakinuć Alaksandr Hleb, pa tvary jakoha ciakła kroŭ.
U druhim tajmie hetaksama raźbili tvar našamu bramniku Siarhieju Vieramko. Mahčyma, u hetym momancie Vieramko i varta było zamianiać. Siarhiej pamylaŭsia i da hetaha, adnak mianiać bramnika — vielmi adkaznaja sprava.
Na 70-aj chvilinie pamyliŭsia centralny abaronca Hajdučyk, a Kabananha prademanstravaŭ svaje najlepšyja jakaści — 1:0.
Praz 10 chvilin prosta škalarskuju pamyłku dapuściŭ Vieramko, jaki vynies miač na nahu Nurhulijevu, jaki pierakinuŭ našaha kipiera — 2:0.
Hulnia ŭ adkaz projdzie praz tydzień u Barysavie. Šancaŭ u BATE na jeŭrakubkavuju vosień zastajecca vielmi-vielmi mała.
