Felčar ukałoŭ Pcičkinu hałaperydoł i nie zapisaŭ heta ŭ žurnał Alaksandar Kryłoŭ raskazaŭ pra padziei ranicy 4 žniŭnia i patłumačyŭ, čamu vyrašyŭ uvieści Pcičkinu mocny zaspakajalnik — hałaperydoł.
Pierad pačatkam pracesu Alaksandar Kryłoŭ paviedamiŭ karespandentu Svabody, što nie pryznaje siabie ni ŭ čym vinavatym.
Praces viadzie sudździa Śviatłana Bandarenka, abvinavačvańnie padtrymlivaje prakuror Vadzim Kisiel, intaresy paciarpiełaj Žanny Pcičkinaj abaraniaje advakat Alaksandr Halijeŭ. Pavodle advakata Halijeva, praces praciahniecca da kastryčnika. «U spravie ŭ jakaści śviedak zajaŭlena 18 supracoŭnikaŭ SIZA, 4 eksperty i jašče 21 śviedka, jakija u toj čas siadzieli ŭ SIZA.
Niekatorych daviadziecca pryvozić ź miescaŭ adbyćcia pakarańnia. Pracy budzie šmat, ale kali budziem pracavać ščylna, dyk u kastryčniku praces skončycca», — miarkuje advakat Alaksandr Halijeŭ.
Pavodle Žanny Pcičkinaj, u spravie 21 tom, u tym liku pakazańni śviedak i supracoŭnikaŭ SIZA. Da hetych pakazańniaŭ maci pamierłaha Pcičkina Žanna Pcičkina stavicca nehatyŭna.
«Tam usie sačynieńni, vydumlali ŭsim SIZA, navat možna ździvicca, jak dobra atrymałasia», — skazała Žanna Pcičkina adnosna pakazańniaŭ niekatorych śviedak ŭ spravie.
Žanna Pcičkina dahetul damahajecca pryciahnieńnia da kryminalnaj adkaznaści inšych supracoŭnikaŭ SIZA № 1, bo miarkuje, što jaje syna zabili. Na praces pryjšoŭ adzin sa śviedak Siarhiej Łaparevič, jaki raspavioŭ pra dopyt śledčymi ŭ spravie Pcičkina kala 200 čałaviek: supracoŭnikaŭ SIZA, sukamernikaŭ, medyčnych supracoŭnikaŭ turemnaha špitala. Pavodle śviedki, Ihar Pcičkin pavodziŭ siabie ŭ SIZA nieadekvatna, jak čałaviek, jaki napiaredadni doŭha ŭžyvaŭ narkotyki, i heta, pavodle śviedki, stała pryčynaj užyvańnia ŭ dačynieńni da jaho specsrodkaŭ achoŭnikami turmy.
«Miarkuju, jon sam pamior u kamery», — padzialiŭsia mierkavańniem śviedka Łaparevič, jaki ŭ žniŭni 2013 hodu adbyvaŭ na «Vaładarcy» pakarańnie i pracavaŭ u składzie absłuhi turemnych pamiaškańniaŭ.
Sud pryznaŭ siastru Ihara Pcičkina Irynu paciarpiełaj u spravie.
Prakuror Vadzim Kisiel začytaŭ abvinavačańnie Alaksandru Kryłovu, felčaru «Vaładarki», jaki dziažuryŭ u dzień śmierci Ihara Pcičkina. Pavodle abvinavačańnia, Pcičkin pamior ad vostraj sardečnaj niedastatkovaści, jakaja raźviłasia ad šerahu pryčynaŭ, u tym liku syndromu ŭžyvańnia narkotykaŭ, parušeńnia vodna-salanoha balansu, psychičnaha razładu. Kryłoŭ nie pryznaŭ siabie vinavatym i pačaŭ davać pakazańni.
Abvinavačany Alaksandar Kryłoŭ skazaŭ sudu, što pratakoły lačeńnia chvorych u SIZA na Vaładarskaha jon ličyć «rekamendacyjnymi», zaležna ad stanu chvoraha i indyvidualnaj sytuacyi.
Kryłoŭ raspavioŭ, što leki dla viaźniaŭ jany padzialajuć na hrupu «A» i hrupu «B». Hety padzieł pravodzicca pavodle dakumentaŭ Ministerstva achovy zdaroŭja.
U hrupu «A» uvachodziać leki, jakija vydajuć chvoramu ŭ prysutnaści lekara, i jon musić pry im pryniać hetyja leki albo moža admovicca, što pratakalujecca. Leki hrupy «B» — heta tyja, jakija mohuć vydać chvoramu dla pryniaćcia ŭ kamery samastojna. «Prykładam, u časie vychodnych, kali niama lekara».
Punkt 4 patrabuje fiksavać u dakumentach vydaču ŭsich lekaŭ, ale na praktycy mohuć być i adstupleńni ad praviła.
«Prykładam, ja vydaju analhin, kali ŭ čałavieka balić hałava. Vydaču takich lekaŭ nieabaviazkova paznačać ŭ dakumentach», — paviedamiŭ felčar Vaładarki.
Pavodle jaho, mocnadziejnyja leki katehoryi «A» jak leki z narkatyčnym uździejańniem abaviazkova ŭnosiacca ŭ žurnał uliku mocnadziejnych lekaŭ. A voś leki hrupy «B» unosiacca ŭ žurnał raschodu zvyčajnych lekaŭ.
Sud vyśviatlaje: «Dyk adzin žurnał jość dla lekaŭ abo dva? Kolki žurnałaŭ?» Kryłoŭ: «Dva žurnały. Druhi dla ŭliku ampułaŭ i tabletak». Sud: «Dyk vy nas nia błytajcie… Jašče jość žurnał i dla ampułaŭ?» Kryło: «Dla hrupy «B» niekalki žurnałaŭ: ampulnyja leki ŭ adnym i tabletavanyja ŭ druhim».
Prakuror pakazvaje žurnał dla hrupy «B», dzie jość zapisy i dla ampulnych lekaŭ, i dla tabletavanych: «Dyk kolki?» Sud i prakuror pierapytvajuć felčara treci raz. Žurnalisty ŭ zale, mahčyma, taksama zabłytalisia, u kolkich žurnałach viadziecca ŭlik lekaŭ na Vaładarcy. Kryłoŭ užo kaža pra 5-6 roznych žurnałaŭ.
Kryłoŭ paviedamiŭ, što pavodle instrukcyi jon jak felčar u vypadku źjaŭleńnia ciažkaha chvoraha ŭ SIZA musić dałažyć pra heta kiraŭniku medyčnaj častki. Ale kali taho niama (prykładam, u vychodnyja), jon musić paviedamić pra heta dziažurnamu pa SIZA. «Sam ja nie mahu pazvanić ani z haradzkoha, ani z mabilnaha telefonu, bo ich nia maju», — skazaŭ Kryłoŭ.
Pra pastupleńnie ŭ SIZA Ihara Pcičkina Kryłoŭ skazaŭ: «Jaho pryviali adnaho da mianie, ja pačaŭ zapaŭniać medyčnuju kartu, spytaŭ pra skarhi na zdaroŭje, paprasiŭ raspranucca da trusoŭ i padniać ruki. Zrabiŭ zapis, što cialesnych paškodžańniaŭ niama, śladoŭ ińjekcyjaŭ taksama nia ŭbačyŭ. Pytaŭsia ŭ jaho, ci ŭžyvaje narkotyki, jon adkazaŭ, što nie. Na pytańnie, ci biła jaho milicyja, jon adkazaŭ, što takoha nie było. Byŭ narmalny chłopiec, uśmichaŭsia».
«Maje źviestki pra Pcičkina ŭ medyčnaj kartcy padpisaŭ dziažurny pamočnik načalnika SIZA, — zhadaŭ Kryłoŭ. — Heta było ŭ aŭtorak, 30 lipienia — kali Pcičkin sieŭ na «Vaładarku».
Nastupnym razam jon ubačyŭ Pcičkina 3 žniŭnia.
Abvinavačany daje pakazańni
Abvinavačany Alaksandar Kryłoŭ, felčar «Vaładarki», raspavioŭ pra padziei 3 žniŭnia, kali padčas jahonaha dziažurstva adbyłosia zdareńnie z aryštantam Iharam Pcičkinym.
Spačatku Kryłoŭ raspavioŭ, jak prymaŭ pierad dziažurstvam leki, jakija zachoŭvajucca ŭ medyčnaj šafie i admysłovym sejfie (dla mocnadziejnych lekaŭ katehoryi «A»). Zhadaŭ, što ŭ toj dzień mocnych lekaŭ u vyhladzie ińjekcyjaŭ inšym viaźniam, akramia Pcičkina, jon nia ŭvodziŭ.
Pcičkina dastavili jamu da abiedu 3 achoŭniki, skazali, što «nieadekvatna pavodzić siabie ŭ kamery»: stukaje ŭ dźviery, patrabuje vypuścić, byli kanflikty z sukamernikami.
Kryłoŭ pačaŭ apytvać Pcičkina, toj byŭ «kantaktny», skazaŭ, što «nia moža znachodzicca ŭ kamery, bo sukamerniki niešta jamu rychtujuć» — ale havaryŭ «niešta vielmi błytana».
«Što chočuć jaho atrucić. U mianie ŭźnikła pieršaja dumka, što heta kanflikt z sukamernikami, što ŭ nas adbyvajecca davoli časta. Pačaŭ vyśviatlać, ale jon dakładna nie patłumačyŭ, z kim kanfliktuje».
Kryłoŭ ahledzieŭ Pcičkina, pamieraŭ jamu cisk, usio było ŭ normie. Znoŭ spytaŭ pra ŭžyvańnie alkaholu i narkotykaŭ — skazaŭ, što nie ŭžyvaje, a potym skazaŭ frazu «kuru travu».
«Ja pierapytaŭ pra travu, ale Pcičkin zamknuŭsia i bolš ničoha nie skazaŭ pra narkotyki».
Tolki dadaŭ, što drenna śpić.
«Ja prapanavaŭ jamu zaspakajalny ŭkoł, ale jon admoviŭsia. Tady ja daŭ jamu tabletku kłazapilinu — heta mocnadziejny zaspakajalny srodak — 25 milihramaŭ. Jon jaje pry mnie prahłynuŭ i zapiŭ vadoj. Usio, jaho vyvieli ad mianie», — pakazaŭ Kryłoŭ.
Abvinavačany patłumačyŭ sudu, što abraŭ hety srodak tamu, što ŭ jaho niama pabočnych nastupstvaŭ. «Heta symptamatyčnaja dapamoha», — skazaŭ Kryłoŭ.
Prava na takuju dapamohu Kryłoŭ abhruntavaŭ tym, što ŭ toj momant lekara va ŭstanovie nie było.
«Kantraloram ja skazaŭ — «pryhladajcie za im», bo ŭsio ž u jaho byli niejkija dziŭnyja pavodziny. A jamu ja rekamendavaŭ paspać», — skazaŭ sudu abvinavačany.
Pavodle Kryłova, jon unios zapis pra kłazapilin i paznačyŭ čas. «Mahčyma, ja paznačyŭ kala 11:00», — kaža Kryłoŭ.
Pry hetym jon skazaŭ, što hadzińnika nia mieŭ, i niama hadzińnika nidzie ŭ medyčnaj častcy. Prakuror: «Dyk jak vy aryjentujeciesia ŭ časie?» — «Kantralor skazaŭ», — adkazaŭ Kryłoŭ.
Felčar: Specsrodkaŭ u dačynieńni da Pcičkina nie ŭžyvałasia
Kryłoŭ tak i nie zhadaŭ, chto mienavita z kantraloraŭ dastaŭlaŭ jamu Ihara Pcičkina ŭ pieršaj pałovie dnia 3 žniŭnia.
«Jany časta mianiajucca», — patłumačyŭ abvinavačany.
Paśla abiedu Ihara Pcičkina znoŭ pryviali da Kryłova, heta zrabili kantralory Radčanka, Famienka i Kubryk.
«Pryviali, pasadzili na kušetku. Skazali pra Pcičkina, što znoŭ staŭ hrukać u dźviery, uzmacnilisia skarhi sukamernikaŭ, jakija zapatrabavali, kab jaho pieraviali. Niešta mnie jašče tłumačyli, ale što mienavita, nia pamiataju», — skazaŭ Kryłoŭ.
Pavodle słovaŭ felčara «Vaładarki» Alaksandra Kryłova, u toj raz Ihar Pcičkin ničoha ŭvohule nie kazaŭ, maŭčaŭ, potym padskočyŭ i vybieh u kalidor:
«Prabieh metry 3—4, tam u nas tualet, jon tudy zaskočyŭ, potym vyskačyŭ adtul ź vialikimi vačami i… usio. Bolš my jamu biehčy nie dali. Sam ja za im nia bieh, ale vyjšaŭ u kalidor. Tam jaho zatrymali kanvojnyja».
Specsrodkaŭ adnosna Pcičkina ŭ toj momant kanvojnyja nie ŭžyvali, skazaŭ Kryłoŭ. Pavodle felčara, kanvojnyja pasadzili Pcičkina na kušetku.
«Maŭčaŭ, hladzieŭ u akno, tamu ja paprasiŭ kanvojnaha stać kala akna, kab tudy nia skočyŭ», — uspomniŭ Kryłoŭ pra Pcičkina i nazvaŭ takija pavodziny «rasstrojstvam adaptacyi» i «reaktyŭnym psychozam». «Reaktyŭny psychoz» — heta nastupnaja stadyja «rasstrojstva adaptacyi», kali čałaviek pačynaje dziejničać nieadekvatna.
3 žniŭnia mienavita hety dyjahnaz pastaviŭ Pcičkinu felčar Alaksandar Kryłoŭ, zapis pra heta jość u jahonaj medyčnaj kartcy.
Alaksandar Kryłoŭ zhadaŭ, što kali Pcičkina pryviali da jaho druhim razam, jon nie zrabiŭ pra heta zapisu, bo zavioŭ na jaho «historyju chvaroby».
Prakuror: «Čamu ŭ hetaj historyi vy napisali, što, ź jahonych słovaŭ, jon rehularna ŭžyvaje narkotyki? Čamu? Jon ža skazaŭ tolki, što «kuryć travu», i ŭsio. Vy sami tak kazali. A čamu tady napisali «rehularna ŭžyvaje narkotyki?»
Kryłoŭ adkazaŭ błytana: «Mahčyma, jon sam heta kazaŭ, ciapier nia pamiataju».
Prakuror zapytaŭ Kryłova, čamu toj nie zapisaŭ u historyju chvaroby, što Pcičkin vyskokvaŭ z kabinetu, zatoje potym u raparcie zapisaŭ, što Pcičkin nibyta sprabavaŭ uciačy, kali jaho viali ŭ kameru.
«Pieršaje vy nia ŭkazvajecie ŭ historyi chvaroby, a pra druhoje pišacie ŭ raparcie, i jano stanovicca pryčynaj užyvańnia da Pcičkina specsrodkaŭ. Čamu takaja niepaśladoŭnaść?» — nastojvaŭ prakuror Vadzim Kisiel.
Kryłoŭ patłumačyŭ, što musiŭ napisać rapart pavodle słužbovych abaviazkaŭ, a ŭ historyi chvaroby zapisaŭ tolki mierkavany dyjahnaz pra narkatyčnuju zaležnaść i «syndrom admieny».
Jak na «Vaładarcy» pryviazvajuć viaroŭkami da łožka
Alaksandar Kryłoŭ skazaŭ, što na momant ahladu nie naziraŭ u Pcičkina stanu tryźnieńnia i halucynacyjaŭ. Kanvojnyja taksama pra heta ničoha nie kazali. Kali Pcičkina pieravodzili z kamery ŭ kameru, jon sam nios svaje rečy i matrac.
Abvinavačany zhadaŭ, što napiaredadni pieravodu ŭ inšuju kameru jon papiaredziŭ Pcičkina, što «pryviaža jaho». Pcičkin, pavodle Kryłova, «byŭ vielmi hiperaktyŭny, jaho nie mahli strymać».
Paśla napisańnia raparta Kryłoŭ pryniaŭ rašeńnie «ŭžyć specsrodki ŭ dačynieńni da Pcičkina — zafiksavać jaho na łožku» ŭ kamery 27.
Taksama Kryłoŭ mierkavaŭ, što dalej budzie dziejničać tabletka kłazapilinu, jakuju daŭ Pcičkinu napiaredadni. Tamu, kab paźbiehnuć nastupstvaŭ dla jaho i sukamernikaŭ, felčar vyrašyŭ pryviazać źniavolenaha Pcičkina da łožka.
«Tolki z metaj, kab paźbiehnuć drennych nastupstvaŭ. Bo byvaje ŭ SIZA, što bjuć škło, režuć siabie i inšych», — patłumačyŭ svajo rašeńnie pryviazać Pcičkina da łožka felčar Kryłoŭ.
«Čałavieka fiksujuć u čatyroch punktach bavaŭnianymi stužkami», — skazaŭ Kryłoŭ.
«Pcičkin sam loh na łožak, ale z nami nie razmaŭlaŭ, byŭ dastatkova spakojny», — skazaŭ Kryłoŭ. Pavodle jaho, da łožka ŭ padhałoŭi była pryvaranaja metaličnaja planka, na joj lažała paduška, na jakuju pakłaŭ hałavu Pcičkin.
Fiksavali Pcičkina kanvairy Traceŭski i Sarakavik.
«Mahčyma, i ja adnu ruku fiksavaŭ, pamiataju dakładna, što nia ja fiksavaŭ nohi».
Nohi fiksujucca pietlami z padvojnaj viaroŭki, jakaja pryviazvajecca da łožka, patłumačyŭ Kryłoŭ. Hetaksama fiksujucca i ruki. Taksama viaroŭka prapuskałasia pa hrudziach, pad pachi i zamacoŭvałasia pad łožkam vuzłami.
Paśla fiksacyi Pcičkinu zrabili ŭkoł zaspakajalnaha srodku.
«Spačatku jon pačaŭ supakojvacca». Praz paŭhadziny, pavodle słovaŭ Kryłova, jon prychodziŭ da Pcičkina pahladzieć, jak jon.
«Lažaŭ spakojna, varušyŭ rukoj, i ja źbiraŭsia hetak prychodzić kožnyja 30—40 chvilin», — skazaŭ felčar.
Kali Kryłoŭ davaŭ pakazańni, jak pryviazvali Pcičkina, maci pamierłaha Žanna płakała ŭhołas. Jaje supakojvała Iryna Pcičkina, siastra niabožčyka.
Sudździa spytaŭ, što bačyŭ felčar, kali prychodziŭ nazirać za Pcičkinym.
«Pcičkin lažaŭ, varušyŭ rukami. Žorstkaj fiksacyi ruk nie było, jon krychu padymaŭ ruku. Advaročvaŭ ad mianie tvar. Byccam by razmaŭlaŭ z sukamernikami», — adkazaŭ felčar Kryłoŭ.
Kali toj pryjšoŭ nastupny raz, Pcičkin «razmaŭlaŭ sam z saboj, zakryvaŭ vočy, spaŭ».
Prakuror spytaŭ, čamu ź Pcičkina nie źniali fiksacyju, čamu jon lažaŭ źviazany 10 hadzin.
Kryłoŭ adkazvaje, što «ŭ jaho źjaviłasia kiepskaja symptamatyka, jon pačaŭ z saboj hučna razmaŭlać, torhać rukami».
Prakuror: Pcičkin pralažaŭ u zafiksavanym stanie 10 hadzin. Vy kažacie, što ŭ jaho ŭžo pačalisia psychičnyja adchileńni. Čamu vy nie zaprasili da jaho specyjalistaŭ?
Kryłoŭ: U mianie nie było mahčymaści pazvanić. Ale heta mahli zrabić inšyja, ja nie pieraškadžaŭ.
Prakuror aburyŭsia: Alaksandar, davajcie tut nia budziem rabić vyhlad… Vy tam byli hałoŭny adkazny za chvoraha viaźnia. Chto, akramia vas, moh vyklikać chutkuju dapamohu?
Kryłoŭ: U mianie nie było dastatkova infarmacyi pra stan Pcičkina i nie było dastatkova viedaŭ u psychijatryi.
Kryłoŭ: «Ranicaj 4 žniŭnia ŭ Pcičkina pačalisia halucynacyi, jon sprabavaŭ sieści, klikaŭ niejkuju Aniu, aktyŭna vyryvaŭsia, nie reahavaŭ na maje słovy i słovy sukamernikaŭ. Voś tady ja vyrašyŭ dać jamu bolš mocny srodak — hałaperydoł. Dva mililitry — dźvie ampuły».
Praz paŭhadziny paśla ińjekcyi Kryłoŭ, pavodle jahonych słovaŭ, viarnuŭsia ŭ kameru i ŭbačyŭ, što Pcičkin staŭ spakajniejšy, choć praciahvaŭ razmaŭlać sam z saboj.
Kryłoŭ skazaŭ, što pra ŭkoł hałaperydołu zrabiŭ zapis u spravazdačnych dakumentach, ale kudy mienavita — nia pamiataje. Pryznaŭ, što ŭ žurnale vykarystanych lekaŭ hetaha zapisu nie zrabiŭ, bo «takija zapisy robiacca ŭ dzień paśla padliku lekaŭ, a tady ŭžo było nie da taho, u nas było ČP».
Prakuror pakazaŭ Kryłovu žurnał raschodu mocnadziejnych srodkaŭ SIZA № 1. U žurnale paznačana, što zraschodavanyja 4 ampuły hałaperydołu. Kryłoŭ kaža, što dźvie ź ich byli ŭviedzienyja Pcičkinu, a kudy padzielisia jašče dźvie, jon nia viedaje. Prakuror spasłaŭsia na ekspertyzu kryvi Pcičkina, pavodle jakoj hałaperydołu ŭ kryvi Pcičkina nie było vyjaŭlena. Jak mahło takoje być?
Kryłoŭ na heta adkazaŭ: «Vydatna. Značyć, ja nie pieravysiŭ paroh dazavańnia, a preparat dobra zasvoiŭsia i pačaŭ dziejničać».
Pra terminy vychadu hałaperydołu z arhanizmu čałavieka Kryłovu nieviadoma.
Pierapynak u sudzie da 10:00 19 vieraśnia.
