Mižnarodny valutny fond pryvitaŭ namahańni aficyjnych orhanaŭ Biełarusi pa refarmavańni piensijnaj sistemy. Razam z tym ekśpierty fondu nastojliva rekamiendavali ŭładam praciahnuć reformy, kab likvidavać piensijny razryŭ paśla 2022 hoda, havorycca ŭ dakładzie piersanału MVF.
Fota Siarhieja Hudzilina
Adznačajecca, u pryvatnaści, što piensijnaja sistema Biełarusi zaraz praktyčna całkam zbałansavanaja dziakujučy pryniatym za apošnija hady mieram. Adličeńni pracadaŭcaŭ i ŭznosy rabotnikaŭ pryblizna adpaviadajuć piensijnym vypłatam. Pry hetym ekśpierty fondu kanstatujuć, što takaja situacyja niecharakternaja dla rehijonu (u mnohich anałahičnych krainach nazirajucca dysbałansy) i adlustroŭvaje šerah mier palityki, pryniatych u Biełarusi za apošnija hady ŭ metach padtrymańnia bałansu, niahledziačy na niehatyŭnyja demahrafičnyja tendencyi. Takija miery ŭklučajuć niadaŭniaje pavieličeńnie minimalnaha stažu pracy dla naznačeńnia piensii pa staraści z 5 da 20 hadoŭ.
Na dumku MVF, niadaŭna pryniataje rašeńnie ab pastupovym pavieličeńni piensijnaha ŭzrostu źmiakčyć niehatyŭnyja demahrafičnyja tendencyi i dazvolić padtrymlivać bałans piensijnaj sistemy da kanca 2022 hoda. Sa studzienia 2017 hoda piensijny ŭzrost budzie štohod pavialičvacca na šeść miesiacaŭ, pakul nie dasiahnie 63 hadoŭ dla mužčyn i 58 hadoŭ dla žančyn, a taksama buduć praviedzienyja ekvivalentnyja pavyšeńni dla lhotnych piensij, piensij za vysłuhu hadoŭ i vajennych piensij.
Adnak, padkreślivajuć ekśpierty fondu, dla praduchileńnia deficytu piensijnaj sistemy nieabchodna pravieści dadatkovyja reformy ŭ pieryjad da 2023 hoda. U analizie piersanału MVF źmiaščajecca prahnoz, što pačynajučy z 2023 hoda biudžet piensijnaj sistemy budzie štohod źnižacca pryblizna na 0,15% VUP. «Aficyjnyja orhany publična paabiacali pryniać dadatkovyja miery (ale nie ŭdakładnili, jakija kankretna) u metach padtrymańnia bałansu piensijnaj sistemy», — havorycca ŭ dakładzie.
Jak adznačajuć u MVF, dadatkovyja reformy ŭ pieryjad da 2023 stvorać prastoru dla źnižeńnia vielmi vysokaha pracenta adličeńniaŭ na sacyjalnaje zabieśpiačeńnie, jaki składaje 35% (29% iduć na piensijnyja adličeńni, astatnija 6% — na inšyja sacyjalnyja prahramy).
Na dumku ekśpiertaŭ, miery mohuć uklučać.
Pastupovaje pavieličeńnie piensijnaha ŭzrostu dla mužčyn i žančyn da 65 hadoŭ i nastupnuju jaho pryviazku da siaredniaj praciahłaści žyćcia; pieraindeksacyju piensijnych dapamoh z ulikam inflacyi, a nie tempu rostu zarabotnaj płaty ŭ doŭhaterminovaj pierśpiektyvie (pry zachavańni peŭnaha źmiešanaha varyjantu dla minimalnych piensij); dalejšaje abmiežavańnie praktyki daterminovaha vychadu na piensiju; miery pa stymulavańni popytu na rabotnikaŭ starejšaj uzrostavaj hrupy.
