SK zaviaršyŭ rasśledavańnie kryminalnaj spravy ab DTZ, u jakim surjoznyja traŭmy atrymaŭ supracoŭnik Dziaržaŭtainśpiekcyi.
Fota SK
U chodzie rasśledavańnia śledčyja dapytali dziasiatki śviedak, praviali dva śledčyja ekśpierymienty, praanalizavali i pryznali rečavymi dokazami niekalki zapisaŭ videarehistrataraŭ. U jakaści śpiecyjalistaŭ pa spravie pryciahvalisia supracoŭniki Dziaržaŭnaha kamiteta sudovych ekśpiertyz, pradstaŭniki bajkierskaha ruchu.
Pavodle atrymanych śledčymi dadzienych, 18 maja kiroŭca matacykła Suzuki Bandit naŭmysna vyjechaŭ na tramvajnyja šlachi na zabaranialny sihnał śviatłafora, čym faktyčna błakavaŭ ruch hramadskaha transpartu. Supracoŭnik DAI, vykonvajučy svaje słužbovyja abaviazki, adreahavaŭ na dadzieny fakt parušeńnia PDR, u tym liku pryniaŭšy pad uvahu adsutnaść rehistracyjnaha znaka na matacykle.
— Padyšoŭšy da kiroŭcy, inśpiektar zapatrabavaŭ zahłušyć ruchavik i pradjavić dakumienty. Matacyklist praihnaravaŭ hetyja patrabavańni i pasprabavaŭ uciačy, pačaŭšy ruch na zabaranialny sihnał śviatłafora. Pry hetym matacyklist paciahnuŭ za saboj inśpiektara, jaki sprabavaŭ jaho spynić. Matacykł vyjechaŭ na skryžavańnie, dzie sutyknuŭsia aŭtamabilem Volkswagen Transporter, — skazali ŭ Śledčym kamitecie.
U vyniku DTZ supracoŭniku milicyi byli pryčynienyja ciažkija cialesnyja paškodžańni. Mužčyna pieranios niekalki apieracyj, u tym liku trepanacyju čerapa. Na praciahu paŭtara miesiaca mužčyna znachodziŭsia ŭ stanie komy.
Śledstvam dakładna vyjaŭlena, što kiroŭca matacykła mieŭ mahčymaść pryniać miery da tarmažeńnia, svoječasova spynicca i nie dapuścić DTZ, ale nie zrabiŭ hetaha.
Na padstavie sabranych dokazaŭ matacyklistu vystaŭlenaje abvinavačvańnie pa č. 1 art. 363 (Supraciŭ supracoŭniku milicyi) i č. 2 art. 317 (Parušeńnie PDR asobaj, jakaja kiravała transpartnym srodkam, što paciahnuła pa nieaściarožnaści pryčynieńnie ciažkaha cialesnaha paškodžańnia) Kryminalnaha kodeksa Respubliki Biełaruś. Abvinavačany znachodzicca pad vartaj.
— U chodzie vyvučeńnia abstavinaŭ, jakija padlahajuć dokazu pa hetaj kryminalnaj spravie, śledstvam atrymanyja źviestki ab tym, što abvinavačvany 1985 hoda naradžeńnia pryciahvaŭsia da administracyjnaj adkaznaści bolš za paŭsotni razoŭ pačynajučy z 2007 hoda. Ź ich 15 razoŭ — za parušeńni chutkasnaha režymu, a piać razoŭ — za nievykanańnie patrabavańniaŭ supracoŭnikaŭ DAI ab spynieńni transpartnaha srodku, — adznačyli ŭ SK.
Kryminalnaja sprava vyvučanaja prakuroram i pieradadzienaja ŭ sud dla razhladu.
