Vystavu «Džok Ściordžes. Biez soramu» ŭ maskoŭskim Centry fatahrafii imia bratoŭ Lumjer spynili. Pra heta, jak pieradaje karespandent «Mieduzy», zajaviŭ žurnalistam staršynia prezidyuma arhanizacyi «Aficery Rasii» i člen Hramadskaj pałaty RF Anton Ćviatkoŭ.
«Kiraŭnictva vystavy pajšło nasustrač Hramadskaj pałacie Rasijskaj Fiederacyi, i vystava ad siońnia začyniena», — zajaviŭ Ćviatkoŭ.
Jon rastłumačyŭ, što napiaredadni atrymaŭ «vializnuju kolkaść zvarotaŭ ad aburanych hramadzian» z nahody vystavy, paśla čaho było vyrašana «ŭvieści tak zvanyja hramadskija sankcyi» i błakavać uvachod u Centr da razhladu pa sutnaści. Kiraŭniki vystavy, pa słovach Ćviatkova, źviazalisia ź im i pahadzilisia da vyrašeńnia pytańnia nie adkryvać ŭvachod.
Ćviatkoŭ paviedamiŭ, što razam z uładalnikami Centra i pradstaŭnikami palicyi ahledzieŭ vystavu, i pryznaŭ, što na joj niama tych «žudasnych, ahidnych fatahrafij», jakija jamu dasyłali ŭ skarhach pa internecie. Adnak, pavodle jaho słoŭ, na «kala 15%» zdymkach pradstaŭleny «napaŭaholenyja dzieci». «My ličym, što heta taksama, viadoma, niedapuščalna, choć nieabchodna davać jurydyčnuju acenku», — zajaviŭ Ćviatkoŭ.
Užo paśla taho, jak vystava była spynienaja, nieviadomy abliŭ mačoj niekalki fotazdymkaŭ, paviedamiŭ karespandent «Lenty.ru».
Aktyvisty hramadskaj arhanizacyi «Aficery Rasii» niejtralizavali chulihana. Pierad tym jak ablić fatahrafii, złamyśnik zajaviŭ, što ekspazicyja «abražaje siamiejnyja kaštoŭnaści i pravakuje piedafiliju».
Fota: @vguseynov
Vystava «Džok Ściordžes. Biez soramu» adkryłasia ŭ Centry fatahrafii imia bratoŭ Lumjer 8 vieraśnia.
Častka naturščyc — aholenyja dziaŭčynki. Pa słovach aŭtara, jaho pracy ŭjaŭlajuć saboj malunak žanočaj natury ŭ pieryjady pałavoha staleńnia. Piersanažy inšych fatahrafij — naviedvalniki nudysckich plažaŭ.
Usiaho ŭ Maskvu było pryvieziena kala 40 rabot. Pradstaŭniki Centra zajavili, što Ściordžes u damovie z halerejaj harantavaŭ zhodu kožnaj madeli na zdymku. U Centry dadali, što dla naviedvańnia vystavy rabot Sterdžesa ŭstanoŭlena ŭzrostavaje abmiežavańnie ad 18 hadoŭ.
