Baćka zahinułaj pad Maładziečnam padčas zboru bulby školnicy źviarnuŭsia da načalnika Maładziečanskaha mižrajonnaha adździeła Minskaha abłasnoha ŭpraŭleńnia departamienta dziaržaŭnaj inśpiekcyi pracy Minpracy i sacabarony. Aleh Papčenia prosić pravieści ź jaho udziełam śpiecyjalnaje rasśledavańnie niaščasnaha vypadku.
Nahadajem, 29 vieraśnia padčas vykanańnia sielskahaspadarčych rabot u SVK «Uschod-ahra» zahinuła vučanica 8-ha kłasa siaredniaj škoły № 11 Maładziečna, 13-hadovaja Viktoryja — na jaje najechaŭ hruzavik. Ad atrymanych traŭmaŭ dziaŭčynka pamierła pa darozie ŭ balnicu. Na miescy zdareńnia pracavała śledča-apieratyŭnaja hrupa. Maładziečanskim rajonnym adździełam SK raspačataja sprava pa prykmietach złačynstva, praduhledžanaha č. 2 art. 317 KK (parušeńnie praviłaŭ darožnaha ruchu i ekspłuatacyi transpartnych srodkaŭ, što paciahnuła pa nieaściarožnaści śmierć čałavieka).
Jak paviedamiŭ BiełaPAN homielski pravaabaronca, pravavy inśpiektar niezaležnaha prafsajuza REP Leanid Sudalenka, jaki dapamoh baćku zahinułaj skłaści zajavu, najmalnik dapuściŭ dzicia da vykanańnia zabaronienaj pracy.
«Pačalisia faktyčnyja pracoŭnyja adnosiny z usimi jurydyčnymi nastupstvami, što adsiul vynikajuć. Zhodna z častkaj 2 artykuła 25 Pracoŭnaha kodeksa faktyčnaje dapuščeńnie rabotnika da pracy źjaŭlajecca pačatkam dziejańnia pracoŭnaha dahavora niezaležna ad taho, ci byŭ pryjom na pracu naležnym čynam aformleny. Najmalnik, SVK» Uschod-ahra», pierad vykarystańniem pracy 13-hadovaha dziciaci byŭ abaviazany vydać zahad ab pryjomie dzicia na pracu, ab jaho dopusku da vykanańnia pracy z abaviazkovym ukazańniem normaŭ vypracoŭki, praciahłaści štodzionnaj pracy i apłaty pracy; zaklučyć ź dziciem u piśmovaj formie pracoŭny dahavor na čas vykanańnia siezonnych rabot», — piša ŭ zajavie Aleh Papčenia.
Akramia taho, najmalnik byŭ abaviazany zapatrabavać miedycynskaje zaklučeńnie ab stanie zdaroŭja i pryznańni dzicia pryhodnym da vykanańnia sielhasrabot, źviazanych ź pieramiaščeńniem ciažaraŭ ŭručnuju i ŭźniaćciem ciažaraŭ na vyšyniu, a taksama pravieści ź dziciem uvodny instruktaž pa achovie pracy i technicy biaśpieki padčas vykanańnia rabot i pryznačyć adkaznaha za biaśpieku dziciaci na sielskahaspadarčaj vytvorčaści. Taksama najmalnik pavinien byŭ zastrachavać dzicia ad niaščasnych vypadkaŭ na vytvorčaści, źviazanaj u tym liku z ekspłuatacyjaj mašyn.
Leanid Sudalenka dadaŭ, što Viktoryja była adzinym dziciem u siamji. «Na pole z kłasam byŭ navat nie kłasny kiraŭnik, a inšy nastaŭnik. Baćka kaža, što suprać taho, kab karali kiroŭcu i nastaŭnika. Kaža, što treba karać tych, chto ich tudy adpraviŭ. Ajcu 42 hady, jon pracuje ŭ kacielni. Maci taksama rabočaja, pracuje pa pierapracoŭcy i ŭtylizacyi płastmasy. Kałhas maŭčyć, čeki na pachavańnie apłaciła škoła», — raskazaŭ pravaabaronca. Jon dadaŭ, što, pavodle słoŭ baćki, u Viktoryi nie było invalidnaści, jak zajaŭlali niekatoryja.
Jak adznačyŭ Sudalenka, baćka zahinułaj dziaŭčynki zajaviŭ, što «nie choča žyć za košt svajho dziciaci», ale pahadziŭsia padpisać zajavu. «Kali budzie raspačataje śpiecyjalnaje rasśledavańnie, siamji naležać vypłaty. Adnarazovaja — 12 siaredniamiesiačnych zarpłat pa haspadarcy, heta kala 3,6 tys. rubloŭ novymi. Maralnuju škodu možna zapatrabavać u sumie kala 20 tys. rubloŭ. Taksama ŭ hienieralnym pahadnieńni jość norma ab vypłacie 10 siaredniehadavych zarobkaŭ, heta značyć kala 36 tys. rubloŭ. U sumie svajakam realna atrymać kala 60 tys. rubloŭ», — patłumačyŭ pravavy inśpiektar.
Pavodle jaho słoŭ, adnarazovuju vypłatu pavinien zrabić «Biełdziaržstrach», kampiensacyju maralnaj škody — SVK, pavodle Hienpahadnieńnia — taksama pracadaŭca. «Adnak dla ŭsiaho hetaha patrebny akt formy N-1 ab tym, što niaščasny vypadak vytvorčy, bieź jaho nijakich vypłat nie budzie. I dla hetaha patrebnaje śpiecrasśledavańnie departamienta pa pracy», — rastłumačyŭ Leanid Sudalenka.
Varta adznačyć, što raniej Sudalenka damohsia pieramohi ŭ spravie traŭmavanaha na Homielskim chimzavodzie rabočaha — praces doŭžyŭsia bolš za čatyry hady.
