Redakcyja časopisa Arche infarmuje, što na składzie zastajucca apošnija 30 asobnikaŭ Arche № 11 - 2010 «Linhvistyka 1920-ch: terminalohija, leksykahrafija, pravapis, farmavańnie litaraturnaj movy».
Na nieadnarazovyja prośby čytačoŭ sioleta pabačyŭ śviet dadatkovy nakład linhvistyčnaha numaru. U 2010 hodzie jon vyklikaŭ vysokuju cikavaść i davoli chutka razyšoŭsia.
Numar pryśviečany biełaruskaj linhvistycy 1920-ch hadoŭ. U im publikujucca pracy movaznaŭcaŭ Mikoły Bajkova, Anatola Bahdanoviča j Lava Ćviatkova — aŭtaraŭ, linhvistyčnuju spadčynu katorych jašče nie da kanca acanili. U časopisie drukujecca faktyčna nieviadomy vodhuk pačynalnika biełaruskaje linhvistyki Jaŭchima Karskaha na vydańnie pracaŭ Akademičnaje kanfierencyi 1926 hoda. Uznaŭlajucca frahmenty palemiki pamiž Ja. Losikam dy I. Vaŭkom-Levanovičam, a taksama ŭpieršyniu drukujecca dakład Vaŭka-Levanoviča «Pra niekatoryja važniejšyja niedachopy biełaruskaj litaraturnaj movy», jaki vyklikaŭ krytyčnyja vodhuki jahonych kaleh i paŭpłyvaŭ na asabisty los navukoŭca. U numary źmiaščajucca publikacyi, pryśviečanyja razhortvańniu pravapisnaje dyskusii dy realnamu funkcyjanavańniu arfahrafii ŭ školnaj praktycy (artykuły Ł. Ćviatkova, S. Niekraševiča, Ja. Losika, A. Losika i S. Zambržyckaha), rad artykułaŭ z haliny stvareńnia terminałohii, kulturamoŭnyja zaciemki Vacłava Łastoŭskaha, vodhuki na słoŭniki Łastoŭskaha, Niekraševiča j Bajkova dy inš.
Apošnija dva dziesiacihodździ isnuje cikavaść da historyi biełaruskaha movaznaŭstva 1920-ch hadoŭ i pracaŭ hetaha peryjadu. Demakratyzacyja hramadskaha i palityčnaha žyćcia druhoje pałovy 1980-ch pryniesła burnyja dyskusii pra historyju i sučasny stan biełaruskaje movy, i na hetaj chvali niezvyčajna ŭzrasła cikavaść da asobaŭ, što zajmalisia daśledavańniem i kadyfikacyjaj biełaruskaje movy, pakinuli śled u historyi navuki jak zasnavalniki abo refarmatary biełaruskaje hramatyki i pravapisu.
Źmiest časopisa tut.
Pra toje, jak znajści časopis, čytajcie na staroncy ŭ sacyjalnych sietkach Arche.
