Minski abłasny sud 19 kastryčnika abviaściŭ vierdykt pa spravie byłoha hałoŭnaha śledčaha stalicy Hieorhija Žuka, jaki abvinavačvaŭsia ŭ atrymańni chabaru ŭ 80 tysiač dalaraŭ. Najbližejšyja dzieviać hadoŭ mužčyna praviadzie ŭ kałonii ŭzmocnienaha režymu, kali Viarchoŭny sud pakinie prysud u sile.
Z abvinavačańnia vynikaje, što chabar były milicyjanier atrymaŭ jašče ŭ 2005 hodzie. Inšyja abvinavačanyja pa hetaj spravie, u tym liku byłyja supracoŭniki KDB i ŭpraŭleńnia pa baraćbie z ekanamičnymi złačynstvami MUS, byli asudžanyja jašče ŭ 2006-m. Žuk amal dziesiać hadoŭ chavaŭsia ŭ Rasii. Svaju vinu jon nie pryznaŭ, zajaviŭ, što byłyja kalehi jaho ahavaryli.
U 2005 hodzie Hieorhij Žuk byŭ namieśnikam načalnika ŭpraŭleńnia papiaredniaha rasśledavańnia HUUS Minharvykankama. Jak tłumačyŭ abvinavačvany ŭ sudzie, na toj čas pasada kiraŭnika była vakantnaj, tamu jon i ličyŭsia hałoŭnym śledčym stalicy.
Chabar, jak vynikaje z abvinavačvańnia, jon atrymaŭ ad litoŭskaha biźniesmiena, jaki mieŭ prablemy z pravaachoŭnymi orhanami ŭ Biełarusi. Tavar, jaki jon pastaŭlaŭ, zatrymlivali, a ŭ adnosinach da padnačalenych raspačynali kryminalnyja spravy. Žuk pahadziŭsia dapamahčy za 150 tysiač dalaraŭ. Adnak atrymaŭ jon hrošy častkova — 80 tysiač. Za heta partnior litoŭca, u jakoha byli suviazi ŭ Administracyi prezidenta, abiacaŭ dapamahčy milicyjanieru zastacca pry pasadzie.
Abvinavačvany byŭ dapytany ŭ adkrytym sudovym pasiadžeńni, adnak dopyt śviedak i daśledavańnie piśmovych materyjałaŭ spravy prachodziła za začynienymi dźviaryma ŭ suviazi z tym, što abviaščalisia dakumienty pad hryfam «dla słužbovaha karystańnia».
Hieorhij Žuk pryznany vinavatym u atrymańni chabaru ŭ asabliva bujnym pamiery (č. 3 art. 430 KK) i pryhavorany da dzieviaci hadoŭ pazbaŭleńnia voli z adbyvańniem pakarańnia ŭ kałonii ŭzmocnienaha režymu. Taksama pryniata rašeńnie ab kanfiskacyi majomaści — aŭtamabila «Miersiedes-Bienc», haraža ŭ Minsku, vintoŭki, pistaleta, patronaŭ, jakija naležali padsudnamu. Pavodle rašeńnia suda Žuk pazbaŭleny zvańnia pałkoŭnika milicyi, na praciahu piaci hadoŭ jon nie moža źjaŭlacca pradstaŭnikom ułady. Akramia taho, jon pavinien vypłacić 80 tysiač dalaraŭ, atrymanych niezakonnym šlacham.
Prysud suda pakul nie nabyŭ zakonnaj mocy i moža być abskardžany ŭ Viarchoŭnym sudzie.
