Carkva ŭ Hrodnie maje vyhladać absalutna niazvykła. Prajekt rabiŭ architektar z Polščy, prafiesar Jury (Ježy) Uścinovič.
Voś tak maje vyhladać novy chram Śviaciciela Śpirydona Trymifunckaha ŭ Hrodnie.
Padrabiaźniej pra budučy chram «Našaj Nivie» raspavioŭ jaho nastajaciel — ajciec Andrej Nazdryn.
«U nas chram Śviaciciela Śpirydona Trymifunckaha — heta hrečaski śviaty, jakoha šanujuć i pravasłaŭnyja, i kataliki. Tamu, kali dumali, jaki chram budavać u jaho honar, vyrašyli, što patrebien vizantyjski styl, — kaža śviatar. — Prajekt vybirali i śviatary, i prychadžanie, i horad. Usim spadabałasia. Ja navat trochi ździviŭsia, bo časta čuješ pra štości niezvyčajnaje, što «heta nie padobnaje da pravasłaŭnaha». A ŭ nas i prychadžanie stałaha vieku padtrymali mienavita hety vobraz chrama. Z radaściu kazali, što ŭ nas budzie ŭnikalny chram, kudy šmat ludziej budzie pryjazdžać malicca».
Admietnaść pabudovy jašče i ŭ tym, što ŭ carkvy budzie adzin vialiki kupał.
«Za asnovu braŭsia Safijski sabor Kanstancinopala. I ŭnutry nie budzie kałonnaŭ, budzie adzinaja vialikaja prastora. Heta, darečy, jašče i zručna — bahasłužeńnie budzie dobra bačnaje kožnamu vierniku, — tłumačyć ajciec Andrej. -
Pra niejkija kankretnyja terminy pabudovy kazać ciažka. Niekatoryja cerkvy ŭ nas budujucca pa dva dziasiatki hadoŭ. U našaj jeparchii rekord — 13 hadoŭ, za jakija pabudavali carkvu Usich Biełaruskich Śviatych. To bok, inšyja vialikija chramy budavali daŭžej.
Ale, spadziajomsia, što ŭ hetym hodzie atrymajem dazvoł na budoŭlu, a ŭ nastupnym užo pačniom. Kali ŭsio budzie dobra, to z božaj dapamohaj, praz 5 hadoŭ aśviacim naš chram, — kaža ajciec Andrej. — Kaštavać chram budzie kala miljona dalaraŭ. Sam prajekt nie vielmi składany. Samaje składanaje — znajści dobrych śpiecyjalistaŭ, jakija buduć jaho budavać».
Darečy, aŭtar prajekta — z Polščy, bo na biełarusaŭ nie chapiła hrošaj.
«Vielmi chaciełasia, kab takija prajekty raspracoŭvali ŭ nas. Ale, na žal, kudy b my ni źviartalisia ŭ Biełarusi, usio skončvałasia vielmi vialikimi hrašyma, — kaža ajciec Andrej. — Biełaruskija architektary chacieli kala miljarda niedeminavanych rubloŭ (heta prykładna 50 tysiač dalaraŭ) za prajekt kompleksu z carkvoj i viečarovaj škołaj. A polski prafiesar Ježy Uścinovič pahadziŭsia biaspłatna. Jon pravasłaŭny nie tolki na słovach — praktykujučy viernik. I skazaŭ tak: «Hrošaj usich nie zarobiš, a pamiać zastaniecca».
Architektar Jury (Ježy) Uścinovič.
Uścinovič — viadomy architektar, jaki zrabiŭ užo kala 30 prajektaŭ chramaŭ.
Chram Pakrova Praśviatoj Baharodzicy ŭ Bielsku Padlašskim. Architektar — Jury Uścinovič. Fota - artos.name.
«Darečy, sustreča-vystava projdzie 23 kastryčnika ŭ 18:00 u aktavaj zale Śviata-Pakroŭskaha kafiedralnaha sabora Hrodna pa vulicy Ažeška, 23. Na joj vystupić i Jury Uścinovič, — kaža ajciec Andrej. — Zaprašajem usich achvotnych! Naš architektar ŭžo amal 30 hadoŭ buduje chramy, čałaviek vielmi daśviedčany, tamu prychodźcie, chto choča, budzie cikava. Možacie, zadać pytańni, kali jość. Naprykład, niekatoryja, pabačyŭšy naš prajekt, pisali, što jon da miačeci padobny. Ja adrazu da architektara, maŭlaŭ, skardziacca, što miačeć budujem. A jon kaža: «A čamu miačeci tak vyhladajuć, viedajecie? Ich budavali pa ŭzory taho samaha Safijskaha sabora!».
Pravasłaŭnaja Carkva Sychodžańnia Śviatoha Ducha na Apostałaŭ u Biełastoku. Architektar - Jury (Ježy) Uścinovič. Fota — Jafim Erychman, pravmir.ru.
Pa prajekcie Uścinoviča, darečy, majuć zbudavać jašče dźvie carkvy ŭ Biełarusi: carkvu Mikałaja Japonskaha ŭ Minsku i carkvu Śviatoha Jurja, iznoŭ ža, u Hrodnie.
Prajekt carkvy Śviatoha Jurja (Śviatoha Vialikamučanika Hieorhija Pabiedanosca) u Hrodnie.
