U niebie nad Siryjaj ŭ niebiaśpiečnaj blizkaści adzin ad adnaho pralacieli vajennyja samaloty PKS Rasii i VPS ZŠA. U piatnicu amierykanski hienierał-lejtenant Džef Charyhan abviaściŭ, što incydent adbyŭsia jašče 17 kastryčnika, adnak da hetaha času nie ahałošvaŭsia, pieradaje newsru.com sa spasyłkaj na CNN.
Reuters
Pa słovach Charyhana, rasijski samalot pralacieŭ u miežach 800 mietraŭ ad amierykanskaj vajennaj mašyny. Aficyjny pradstaŭnik VPS ZŠA zajaviŭ, što amierykanski piłot pasprabavaŭ źviazacca z rasijskim pa kanałach ekstrannaj suviazi, ale jaho vyklik byŭ praihnaravany.
Na nastupny dzień paśla incydentu, 18 kastryčnika, pradstaŭniki Pientahona źviazalisia z rasijskimi kalehami, jakija zajavili, što piłot rasijskaha źniščalnika nie zaŭvažyŭ niebiaśpiečnaha zbližeńnia, dadaŭ Charyhan, jaki pry hetym pryznaŭ, što abodva samaloty vykonvali palot z vyklučanymi ahniami.
Charyhan adznačyŭ, što ryzyka padobnych incydentaŭ uzrasła ŭ apošnija tydni ŭ suviazi z pavieličeńniem prysutnaści amierykanskich VPS na paŭnočnym zachadzie Siryi, dzie idzie apieracyja pa vyzvaleńni ad bajevikoŭ terarystyčnaj arhanizacyi «Isłamskaja dziaržava» horada Raka.
Raniej pradstaŭnik Centralnaha kamandavańnia VS ZŠA Džon Tomas zajaviŭ, što Vašynhton hatovy ŭdaskanalvać miechanizm znosin z rasijskimi PKS, nahadvaje ahienctva Reuters. Paźniej sa spasyłkaj na krynicu ŭ Pientahonie žurnalisty paviedamili, što Vašynhton nastojvaje na tym, što niebiaśpiečnaje zbližeńnie samalotaŭ adbyłosia nie złamysna.
Paviedamleńni ab incydencie ŭ niebie nad Siryjaj źjavilisia na fonie zajavy ministra zamiežnych spraŭ Rasii Siarhieja Łaŭrova, jaki vykazaŭsia za praciah aktyŭnych bajavych dziejańniaŭ u Alepa, adznačyŭšy, što «terarystaŭ treba dabivać», a ŭ pradstaŭnikoŭ apazicyi było dastatkova času, kab ad ich admiežavacca.
«Siońnia 10 dzion, jak ni Rasija, ni Siryja nie vykarystoŭvajuć svaje vajenna-pavietranyja i vajenna-kaśmičnyja siły vakoł Alepa naohuł. I viadoma, za hety pieryjad całkam možna było razabracca choć by z raźmiežavańniem va Uschodnim Alepa, nie kažučy ab inšych častkach Siryi, choć hetaja zadača staić vielmi vostra i dla inšych rajonaŭ Siryjskaj Arabskaj Respubliki», — padkreśliŭ Łaŭroŭ.
Napiaredadni suśvietnyja ŚMI abmiarkoŭvali inšy incydent, źviazany ź niebiaśpiečnym zbližeńniem vajennych RF i ZŠA. Tak, ahienctva Bloomberg paviedamiła ab tym, što prezident RF Uładzimir Pucin vielmi rezka adreahavaŭ na dziejańni Minabarony padčas incydentu ŭ Čornym mory, kali rasijskija vajennyja samaloty pralacieli ŭ niepasrednaj blizkaści ad amierykanskaha vajennaha karabla.
Pa słovach nienazvanaha vysokapastaŭlenaha rasijskaha čynoŭnika, na jakoha spasyłajucca žurnalisty, Pucin acharaktaryzavaŭ vypadak jak «vielmi ryzykoŭny». U adkaz na zaŭvahi rasijskich čynoŭnikaŭ ab tym, što «amierykancy heta zasłužyli», prezident skazaŭ: «Vy z hłuzdu źjechali?».
Taksama prezident nazvaŭ niedapuščalnym «brazhańnie» jadziernaj zbrojaj. «Brazhać atamnaj zbrojaj — samaja apošniaja sprava. Heta škodnaja rytoryka, i ja jaje nie vitaju», — zajaviŭ jon na pasiadžeńni dyskusijnaha kłuba «Vałdaj». U toj ža čas jon zaklikaŭ «zychodzić z realij», a mienavita z taho, što jadziernaja zbroja «źjaŭlajecca faktaram strymlivańnia i faktaram zabieśpiačeńnia miru i biaśpieki va ŭsim śviecie».
