U skład savieta dyrektaraŭ rasijskaj naftavaj kampanii «RusNafta» uvajšoŭ Andrej Dzierach, staršynia savieta dyrektaraŭ biełaruskaj inviestycyjnaj kampanii «Juniter». Jak vynikaje z materyjałaŭ naftavaj kampanii, naroŭni ź Dzieracham u saviet dyrektaraŭ u jakaści niezaležnaha dyrektara «RusNafty» uvajšoŭ i były premjer-ministr Rasii, eks-kiraŭnik Padlikovaj pałaty Siarhiej Ściapašyn.
Da zasnavańnia inviestycyjnaj kampanii «Juniter» ŭ 2002 hodzie Dzierach zajmaŭ pasady ekanamičnaha savietnika Mindziaržmajomaści pa pytańniach inviestycyj u naftavy siektar i siektar telekamunikacyj (1992—1994), a taksama byŭ dyrektaram pa inviestycyjach i karparatyŭnych adnosinach kampanii «Słaŭnafta» (1994—2002).
U 2003 hodzie Dzierach prajšoŭ śpiecyjalizavanuju padrychtoŭku pa pytańniach raźvićcia i kiravańnia ŭ naftahazavym siektary dla kiraŭnikoŭ krain SND pa prahramie SABIT u ZŠA.
«Na naš pohlad, źnižeńnie suśvietnych cen na naftu adkryvaje značnyja pierśpiektyvy dla biełaruskaj chimičnaj pramysłovaści», — zajaviŭ Dzierach ŭ vieraśni 2016 hoda ŭ hutarcy z karespandentam BiełaPAN.
Jon adznačyŭ, što, za vyklučeńniem biełaruskaha «Hrodna Azota», jaki dla vytvorčaści pradukcyi vykarystoŭvaje haz, dla inšych bujnych pradpryjemstvaŭ chimičnaj pramysłovaści krainy asnoŭnym źjaŭlajecca naftavaja syravina.
Dzierach ličycca adnym z pavažanych u dziełavych kołach ekśpiertaŭ pa pytańniach naftachimičnaj pramysłovaści. Naziralniki źviazvajuć jaho ŭvachodžańnie ŭ saviet dyrektaraŭ «Rusnafty» u tym liku z budučyniaj IPO, jakoje čakajecca sioleta na Maskoŭskaj biržy.
Letam 2016 hoda saŭładalnik «Rusnafty» Michaił Hucaryjeŭ zajaviŭ u intervju telekanału «Rasija 24», što kampanija płanuje atrymać u vyniku IPO 400—500 młn dołaraŭ. U jakaści patencyjnych inviestaraŭ, jakija mohuć kupić akcyi «Rusnafty», Hucaryjeŭ nazvaŭ zachodnija banki, a taksama kampanii z Kazachstana, Azierbajdžana i Biełarusi.
