Vysoki ŭzrovień biełaruska-rasijskaha ŭzajemadziejańnia pa ŭmacavańni abaronnaha patencyjału Sajuznaj dziaržavy asabliva aktualny zaraz, «kali mižnarodnyja miechanizmy, zaklikanyja vyrašać kryzisnyja situacyi, prabuksoŭvajuć, ačahi ž napružanaści ŭščylnuju nablizilisia da našych miežaŭ». Pra heta zajaviŭ ministr abarony RF Siarhiej Šajhu na štohadovym pasiadžeńni sumiesnaj kalehii vajennych viedamstvaŭ Biełarusi i Rasii 2 listapada ŭ Minsku.
mil.by
Jak paviedamlaje departamient infarmacyi i masavych kamunikacyj Ministerstva abarony Rasii, Šajhu adznačyŭ, što na zachodnich miežach Sajuznaj dziaržavy ZŠA i inšyja členy NATA aktyŭna naroščvajuć svoj nastupalny patencyjał, adkryvajučy novyja bazy i raźvivajučy vajennuju infrastrukturu. Nie spyniajucca sproby naviazać svaju volu inšym krainam z dapamohaj ekanamičnaha i palityčnaha dyktatu, a taksama vajennaj siły, viadziecca adkrytaja infarmacyjnaja vajna.
«Hetyja dziejańni padryvajuć stratehičnuju stabilnaść i vymušajuć Rasiju prymać u adkaz miery abarončaha charaktaru, u tym liku na zachodnim stratehičnym kirunku, — cytuje departamient kiraŭnika Minabarony. — Ciapier čas vialikaja ŭvaha nadajecca zabieśpiačeńniu złučeńniaŭ i voinskich čaściej Zachodniaj vajennaj akruhi sučasnym uzbrajeńniem i vajennaj technikaj, a taksama praviadzieńniu mierapryjemstvaŭ apieratyŭnaj i bajavoj padrychtoŭki».
Pavodle słoŭ Šajhu, šerah kamandna-štabnych vučeńniaŭ i trenirovak arhanizujucca sumiesna z ŭzbrojenymi siłami Biełarusi. Najbolš bujnyja ź ich — sumiesnyja vučeńni pavietrana-desantnych vojskaŭ i sił śpiecyjalnych apieracyj, kamandna-štabnyja vučeńni Kalektyŭnych sił apieratyŭnaha reahavańnia ADKB «Uzajemadziejańnie-2016», vučeńni ź miratvorčymi kantynhientami ADKB «Nieparušnaje braterstva — 2016».
Na siońniašniaj kalehii zaćvierdžany asnoŭnyja padychody da padrychtoŭki i praviadzieńnia biełaruska-rasijskich stratehičnych vučeńniaŭ «Zachad-2017», paviedamlaje departamient infarmacyi Minabarony RF.
Praktyčnyja dziejańni vojskaŭ płanujecca adpracavać u vieraśni 2017 hoda adnačasova na niekalkich palihonach Rasii i Biełarusi. «Pry raspracoŭcy zadumy i scenaryja budzie ŭličana situacyja, źviazanaja z uzmacnieńniem aktyŭnaści NATA pablizu hranic Sajuznaj dziaržavy», — skazaŭ Šajhu, padkreśliŭšy, što vučeńni stanuć hałoŭnym mierapryjemstvam sumiesnaj padrychtoŭki ŭzbrojenych sił dźviuch krain u nastupnym hodzie.
Sumiesnaja kalehija taksama abmierkavała chod vykanańnia Płana sumiesnych mierapryjemstvaŭ ministerstvaŭ abarony pa arhanizacyi vajennaj biaśpieki Sajuznaj dziaržavy na 2016—2018 hady. «Pry ich praviadzieńni asnoŭny ŭpor robim na padrychtoŭku orhanaŭ vajennaha kiravańnia i vojskaŭ, padtrymańnie nieabchodnaha ŭzroŭniu apieratyŭnaj sumiaščalnaści. U dalejšym płanujem ŭzmacniać praktyčnuju nakiravanaść padobnych mierapryjemstvaŭ z ulikam źniešniepalityčnych realij», — adznačyŭ Šajhu.
Vialikuju ŭvahu, pavodle jaho słoŭ, baki nadajuć «realizacyi Pahadnieńnia ab sumiesnaj achovie źniešniaj miažy Sajuznaj dziaržavy ŭ pavietranaj prastory i stvareńni Adzinaj rehijanalnaj sistemy SPA Rasii i Biełarusi».
U suviazi z hetym Šajhu nahadaŭ, što ŭ 2016 hodzie rasijskija pramysłovyja pradpryjemstvy zaviaršyli kapitalny ramont zienitnych rakietnych kompleksaŭ S-300PS, pieradadzienych raniej Biełarusi na biazvypłatnaj asnovie.
«Miery, što prymajucca pa ŭdaskanaleńni niasieńnia bajavoha dziažurstva pa supraćpavietranaj abaronie, dazvolać nie dapuścić parušeńniaŭ pavietranaj prastory Sajuznaj dziaržavy», — zajaviŭ rasijski ministr.
Udzielniki pasiadžeńnia ŭzhadnili asnoŭnyja kirunki pavyšeńnia efiektyŭnaści vidaŭ bajavoha i techničnaha zabieśpiačeńnia rehijanalnaj hrupoŭki vojskaŭ, a taksama razhledzieli pierśpiektyvy ŭdaskanaleńnia nacyjanalnych zakanadaŭstvaŭ u śfiery zakupak dla patreb abarony i biaśpieki. Hetyja pytańni, pavodle słoŭ Šajhu, buduć padrabiazna abmiarkoŭvacca z pradstaŭnikami abaronna-pramysłovaha kompleksu Biełarusi ŭ ramkach navukova-dziełavoj prahramy Mižnarodnaha vajenna-techničnaha forumu «Armija-2017».
Na kalehii zaćvierdžany płan supracoŭnictva na 2017 hod, jaki ŭklučaje bolš za 130 mierapryjemstvaŭ.
Varta adznačyć, što siońniašniaje pasiadžeńnie sumiesnaj kalehii, jak i rabočy vizit Šajhu ŭ Minsk, nie anansavalisia ni adnym z bakoŭ.
