7 listapada na sajcie źjaviŭsia materyjał «Miratvorac-2: Biełaruskaje vydańnie», pryśviečany daśje. Daniła Citarenka pačaŭ z taho, što zadaŭsia pytańniem: čamu aŭtar materyjału ŭ «NN» ličyć, što paniaćcie «zachodnierusizmu» ŭźnikła ŭ XIX stahodździ? Citarenka spasyłajecca na rabotu Alaksandra Ćvikieviča «Zapadno-ruśsizm»: Narysy z historyi hramadzkaj myśli na Biełarusi ŭ XIX i pačatku XX v.» i havoryć, što termin źjaviŭsia ŭ 1720 hodzie.
Nie zhodny jon i z tym, što zachodnierusisty XIX stahodździa paraŭnoŭvali miascovyja tradycyi z tradycyjami ŭnutranych hubierniaŭ Rasii. I što «elemienty, jakija nie adpaviadali ruskamu ekvivalentu, abjaŭlalisia naniesienymi, polskimi — ich nieabchodna było vykaranić i źniščyć». Citarenka śćviardžaje, biez spasyłak na histaryčnyja krynicy, što zachodnierusisty najpierš zajmalisia daśledavańniem biełaruskaj kultury, a «čužym elemientam» ličyli pałanizacyju miascovaha sialanstva i šlachty.
Dalej žurfakaviec spračajecca z tym, što ŭtvareńnie Biełaruskaj Narodnaj Respubliki stała pačatkam stanaŭleńnia biełaruskaj dziaržaŭnaści. Jon davodzić, što, pakolki Rada BNR nie mieła ŭłasnaj armii, palicyi i kantrolu nad terytoryjaj, to i ŭličvać heta nie varta. Na dumku Citarenki, sapraŭdnaja pieršaja biełaruskaja dziaržava — BSSR. Ale jon pahadžajecca, što palityka biełarusizacyi pachavała ideju zachodnierusizmu.
Toje, što ŭ materyjale pryvodziacca imiony i vykazvańni sučaśnikaŭ-zachodnierusistaŭ, aburyła Citarenku. «Aŭtar nie abmiažoŭvajecca pieralikam. Jon biare vykazvańni i pohlady hetych ludziej, navat ahulnadastupnuju infarmacyju i pierakručvaje ich, stvarajučy niejkaje padabienstva kampramatu», — piša jon.
I prychodzić da vysnovy, što «nasamreč u materyjale adčuvajecca zajzdraść da «zachodnierusistaŭ», bo ŭ BNF daŭno nastupili ciažkija časy».
Naprykancy materyjału Citarenka ŭzhadvaje mierkavańnie Davydźki pra śviežy numar «NN», jakoje jon vykazaŭ padčas prahramy «Kłub redaktaraŭ».
«Ščyra spadziajusia, što biełaruskaj apazicyi raptam dadasca adekvatnaści. Inakš jany stanuć stvaralnikami novaha kahnityŭnaha dysanansu — «libierały» i «demakraty» stvarajuć tatalitarny kancłahier ź Biełarusi», — padsumoŭvaje aŭtar.
Pałova materyjału žurfakaŭca samoj publikacyi pra zachodnierusistaŭ nie pryśviečana. Citarenka asudžaje BNF, vykazvaje sumnieńni ŭ aŭtarytecie aŭtara tekstu Ihara Lalkova i abvinavačvaje «Našu Nivu» ŭ nieprafiesijanaliźmie.
Raniej Daniła Citarenka raspavioŭ «NN», čamu jon piša ździeklivyja artykuły pra apazicyju na čarnasocienski sajt «Rumoła».
Daviedka:
Ihar Lalkoŭ, aŭtar publikacyi «Chto choča zrabić ź Biełarusi Zachodniuju Rasiju». Skončyŭ histaryčny fakultet Biełaruskaha dziaržaŭnaha ŭniversitetu (1997), Sarbonski ŭniversitet (Francyja, 1998) i mahistraturu Centra ŭschodniejeŭrapiejskich daśledavańniaŭ Varšaŭskaha ŭniviersiteta (Polšča, 2003). U 1997—2001 hh. pracavaŭ u Nacyjanalnym archivie Biełarusi, Dziaržaŭnym kamitecie pa archivach i spravavodstvie Biełarusi, Biełaruskim navukova-daśledčym centry elektronnaj dakumientacyi. U 2002—2007 hh. vykładaŭ u Biełaruskim Kalehiumie, Varšaŭskim univiersitecie (Polšča), Karłavym univiersitecie (Praha, Čechija), Vyšejšaj škole dziaržaŭnaj administracyi ŭ Biełastoku (Polšča). Ad 2008 h. — v.a. staršyni, a potym staršynia Minskaj abłasnoj rady Biełaruskaha dobraachvotnaha tavarystva achovy pomnikaŭ historyi i kultury.
