8 śniežnia spoŭnicca 25 hadoŭ z dnia histaryčnaj sustrečy ŭ Viskulach. Troje z šaści padpisantaŭ pahadnieńnia ab rospusku SSSR — Stanisłaŭ Šuškievič, Leanid Kraŭčuk i Hienadź Burbulis — na hetym tydni pryjechali ŭ Vašynhton, kab pryniać udzieł u jubilejnych mierapryjemstvach, arhanizavanych šeraham amierykanskich hramadskich arhanizacyj i univiersitetaŭ.
Vystupajučy napiaredadni na sustrečy ŭ «Atłantyčnym saviecie», palityki razvažali pra toje, jak prymianić minuły vopyt dla adkazu na novyja vykliki i, u pryvatnaści, pierad tvaram sprobaŭ Kramla adnavić rasijskaje panavańnie na postsavieckaj prastory.
Pavodle słoŭ pieršaha dziaržsakratara RF Hienadzia Burbulisa, sučasnaje hramadstva ŭ jašče bolš vostraj formie maje patrebu ŭ pahadnieńni, padobnym tamu, što było zaklučana ŭ Biełaviežskaj puščy. Jon ličyć, što prablema rasijska-ŭkrainskich adnosin nie moža być vyrašana zvonku z pahłybleńniem sankcyj i izalacyjaj roznaha rodu. «Kali hetyja miery nie pracujuć užo dva hady, značyć, treba mianiać i taktyku, i stratehiju», — skazaŭ Burbulis.
Pieršy prezident Ukrainy Leanid Kraŭčuk, naadvarot, padtrymlivaje ideju cisku na Kreml, adznačajučy, praŭda, što «tolki sankcyjami paradku nie dasiahnieš». Jon zhodny z rasijskim kaleham u tym, što nabyćcio aŭtarytetu praź siłu viadzie ŭ tupik: «Ciapierašniaja situacyja nienašmat składaniejšaja, čym jana była napiaredadni padpisańnia biełaviežskich pahadnieńniaŭ. Ale čamu suśvietnyja lidary nie mohuć siońnia znajści rašeńnie ŭ imia ludziej, jakija nie chočuć vajny. Ja upeŭnieny, što inšaj darohi, akramia darohi miru, dla Ukrainy niama».
Kažučy pra toje, ci hatovy novaabrany amierykanski prezident źmianić pohlady ZŠA na situacyju va Ukrainie, Leanid Kraŭčuk prapanavaŭ nie śpiašacca z acenkami, a pačakać zajavy Donalda Trampa paśla ŭstupleńnia na pasadu». Pakul u jakaści prezidenta jon nie skazaŭ ničoha. Ale kali jon pryznaje aneksiju Kryma, ja prymu heta vielmi niehatyŭna», — skazaŭ Kraŭčuk.
Były staršynia Viarchoŭnaha Savieta Biełarusi Stanisłaŭ Šuškievič ličyć, što pierad tvaram ahresiŭnaj palityki Maskvy Biełaruś taksama znachodzicca ŭ niezajzdrosnym stanoviščy. Pavodle jaho słoŭ, Kreml «budzie sa skury von leźci, kab zrabić Biełaruś kałonijaj svajoj impieryi». Adnak, na dumku Šuškieviča, navat niahledziačy na toje, što «antybiełaruski prezident» spachabiŭ ŭsio, što było dasiahnuta ŭ Biełaviežskaj puščy, biełaruskaja moładź razumieje, što jaje kraina nie prydatak Rasii. «Rana ci pozna Biełaruś stanie narmalnaj cyvilizavanaj dziaržavaj», — upeŭnieny Šuškievič.
Sustrečy z udziełam Šuškieviča, Kraŭčuka i Burbulisa, pryśviečanyja 25-j hadavinie padpisańnia biełaviežskich pahadnieńniaŭ, zapłanavanyja ŭ roznych dziaržaŭnych ustanovach i univiersitetach Vašynhtona i Bostana.
