Pavodle infarmacyi ahienctva Amaq, jakoje pieradaje naviny ad isłamistaŭ «Isłamskaj dziaržavy», bajeviki zachapili 30 rasijskich tankaŭ, vialikuju kolkaść rakiet dla ustanovak «Hrad», šmat bojeprypasaŭ u staražytnaj Palmiry.
Uradavyja vojski Siryi pry padtrymcy Rasii ŭpieršyniu adbili Palmiru ŭ isłamistaŭ u sakaviku.
Adnak na minułym tydni bajeviki ID pačali niečakany nastup na horad, uziali pad kantrol susiednija naftavyja radoviščy i nablizilisia da aviabazy T4, jakuju vykarystoŭvaje rasijskaja aviacyja, paviedamlaje Reuters.com.
Pad pahrozaj akružeńnia i źniščeńnia z Palmiry stali ŭciakać cełyja vajskovyja padraździaleńni.
Usiaho bajeviki paviedamili pra zachop 30 tankaŭ, siami BMP, šaści artyleryjskich harmat D-30, dziesiaci zienitnych ustanovak ZU-23, adnoj ustanoŭki «Hrad».
Na videa bačna, što terarystam dastałasia i adna z rasijskich braniravanych raźviedvalna-patrulnych mašyn «Dazor», piša rasijski błoh bmpd.livejournal.com.
«Heta znoŭ udar pa prestyžy. U tym liku i pa našym prestyžy», - zajaviŭ były načalnik Hienštaba US RF hienierał armii Jury Bałujeŭski.
Pa mierkavańni izrailskaha ekśpierta Ihala Levina, razmovy pra 4.000 džychadystaŭ, jakija byccam by šturmavali Palmiru - prapahanda Rasii, «kab choć niejak schavać hetuju hańbu».
Videa z častkaj trafiejaŭ «Chalifata» u Palmiry.