Supracoŭnik adnaho z pryvatnych pradpryjemstvaŭ Asipovičaŭ prysvoiŭ i prajhraŭ za noč u kazino bolš za 4,6 tysiač rubloŭ (kala 2,3 tysiač dalaraŭ), paviedamiła aficyjny pradstaŭnik upraŭleńnia Śledčaha kamiteta pa Mahiloŭskaj vobłaści Aksana Salaniuk.
Pracujučy kiroŭcam, mužčyna razvoziŭ realizavany z dapamohaj internetu tavar zakazčykam, jakija addavali jamu za jaho hrošy. Tak, za dzień nabrałasia davoli vialikaja suma — bolš za 9 tysiač rubloŭ. Ale zamiest taho, kab zdać ich u kasu, supracoŭnik PP pajechaŭ u Babrujsk i bolš za pałovu atrymanych hrošaj prajhraŭ u kazino. Daviedaŭšysia na nastupny dzień ab takoj bujnoj niastačy, kiraŭnictva pryvatnaha pradpryjemstva źviarnułasia za dapamohaj u pravaachoŭnyja orhany. U dačynieńni da miascovaha žychara Asipovicki rajonny adździeł Śledčaha kamiteta raspačaŭ kryminalnuju spravu pa č. 1 art. 211 (prysvajeńnie i rastrata majomaści asobaj, jakoj jano davierana) KK RB.
«Śledčyja dziejańni praciahvajucca, u dačynieńni da padazravanaha pryznačanaja psichołaha-psichijatryčnaja ekśpiertyza, jakaja ŭ tym liku dapamoža vyśvietlić, ci jość u mužčyny hulniavaja zaležnaść. Jamu pahražaje da 4 hadoŭ pazbaŭleńnia voli», — skazała Aksana Salaniuk.
