Za minułyja vychadnyja dni va ŭstanovy achovy zdaroŭja źviarnulisia 180 čałaviek ź pieraachaładžeńniem i abmaražeńniami, paviedamiła pres-sakratar Ministerstva achovy zdaroŭja Volha Šulpina.
U pryvatnaści 7 studzienia z chaładovymi traŭmami da miedykaŭ źviarnulisia 94 čałavieki, u tym liku 12 dziaciej, 8 studzienia — 86 čałaviek, u tym liku troje dziaciej. «Niekaha ź ich špitalizavali, niekaha ahledzieli ambułatorna i dali rekamiendacyi», — adznačyła Šulpina.
Pra kolkaść zahinułych ad pieraachaładžeńnia, pavodle jaje słoŭ, kazać pakul rana, bo dakładnuju pryčynu śmierci ludziej, znojdzienych za apošnija dni zahinułymi, zmoža ŭstalavać tolki sudmiedekśpiertyza.
Usiaho z 28 listapada 2016 hoda va ŭstanovy achovy zdaroŭja źviartalisia 374 pacyjenty z chaładovymi traŭmami.
Vałanciory Biełaruskaha tavarystva Čyrvonaha Kryža z 6 pa 8 studzienia 15 razoŭ akazvali pieršuju dapamohu paciarpiełym ad pieraachaładžeńnia, paviedamiŭ kiraŭnik adździeła pa reahavańni na nadzvyčajnyja situacyi i vyšuku BTČK Dźmitryj Rusakoŭ. U pryvatnaści kala chramaŭ, pavodle jaho słoŭ, patrabavałasia dapamoha ludziam, jakija stracili prytomnaść z-za nizkich tempieratur. «Tam dziažuryła chutkaja dapamoha, tamu my akazvali padtrymku pa transpartavańni da karety chutkaj dapamohi. My manitoryli hetyja situacyi — usie ludzi žyvyja, zdarovyja», — adznačyŭ śpiecyjalist.
Trynaccać z pałovaj tysiač čałaviek padčas mocnych marazoŭ naviedali stacyjanarnyja i mabilnyja punkty abahrevu BTČK. Punkty pracujuć u Biełarusi z 5 studzienia, i bolš za ŭsio ludziej prychodziła pahrecca 6 i 7 studzienia — 4,8 tys. I 5,1 tys. čałaviek adpaviedna, skazaŭ Rusakoŭ.
Ź piatnicy pa niadzielu vałanciory Čyrvonaha Kryža razam z pradstaŭnikami dziaržorhanaŭ naviedali bolš za 160 biazdomnych, jakim była vydadzienaja ciopłaja vopratka, charčavańnie na tydzień, niekatoryja biazdomnyja byli raźmieščanyja ŭ punktach časovaha znachodžańnia ci balnicach. Surjoznych vypadkaŭ abmaražeńnia ŭ ludziej, jakich naviedvali vałanciory, nie vyjaŭlena, choć adnaho čałavieka ŭsio ž dastavili ŭ miedycynskuju ŭstanovu. «Zastajecca prablema, źviazanaja z tym, što ludzi saromiejucca źviartacca ŭ miedycynskija ŭstanovy z-za svajho źniešniaha vyhladu», — adznačyŭ Rusakoŭ.
Za čatyry dni vałanciory dapamahli 120 vadzicielam, čyje mašyny zahłuchli na darohach. U cełym, pavodle słoŭ pradstaŭnika BTČK, pieryjad marazoŭ prajšoŭ bolš spakojna, čym zvyčajna. «Taja praca, jakuju praviali i my, i MNS, i dziaržorhany, dała svoj vynik. U pieršuju čarhu heta bačna pa vadzicielach, tamu što jany sapraŭdy vybrali varyjant nie vyjazdžać, — mnohija mašyny zastalisia ŭ dvarach, u nas pracy było značna mienš, čym zvyčajna. Što da nasielnictva ŭ cełym, to z vopytu možna skazać, što navat u kaladnyja śviaty mnohija pabajalisia iści [u carkvu]. U nas u punktach abahrevu ŭ načny pieryjad padčas usianočnaj narodu było niašmat», — skazaŭ Rusakoŭ.
U niekatorych situacyjach, pavodle jaho słoŭ, ludziej było šmat i ŭ mabilnych pałatkach, naprykład u vioscy Barań Barysaŭskaha rajona, dzie 8 studzienia prachodziła raźvitańnie z zabitaj u minułuju piatnicu ihumieńniaj manastyra. U vioscy pracavali pałatki abahrevu Čyrvonaha kryža i MNS.
