13 studzienia ŭ sudzie Čyhunačnaha rajona Homiela adbylisia sprečki pa kryminalnaj spravie ŭ dačynieńni da hamialčanina, jaki abvinavačvajecca ŭ zabojstvie byłoj žonki.
55-hadovy žychar Homiela na vulicy zarezaŭ byłuju žonku, jakaja maładziejšaja za jaho na 19 hadoŭ. Trahiedyja zdaryłasia ŭ mikrarajonie Vałatava 5 vieraśnia 2016 hoda. Vidavočcy vyklikali milicyju i chutkuju dapamohu. Paciarpiełaja pamierła na miescy ad masiŭnaj krovastraty. Lekary kanstatavali śmierć, a supracoŭniki DAI, jakija pieršymi prybyli na vyklik, zatrymali padazronaha.
Siarhiej i Hanna byli žanatyja piać hadoŭ, skasavali šlub u 2010 hodzie. Ale byłaja žonka časta byvała ŭ Siarhieja, karystałasia jaho finansavaj dapamohaj. Žančyna, pavodle słoŭ śviedkaŭ i abvinavačanaha, viała amaralny ład žyćcia, złoŭžyvała ałkaholem, krała hrošy ŭ byłoha muža.
U dzień trahiedyi jana taksama naviedała byłoha muža. Paśla vizitu Hanny haspadar kvatery vyjaviŭ prapažu hrošaj, i nie ŭ pieršy raz. Tamu adpraviŭsia na pošuki žančyny, prychapiŭšy nož. Na sudzie patłumačyŭ, što nož uziaŭ nie dla zabojstva, a dla samaabarony, bo byłaja žonka žyła ŭ kvatery z asacyjalnymi asobami i jon bajaŭsia za svajo žyćcio. Hannu były muž sustreŭ na vulicy, na jaho prapanovu addać hrošy pa-dobramu žančyna adkazała abrazaj: «Pajšoŭ ty, stary kazioł». Paśla hetaha mužčyna nanios joj niekalki ŭdaraŭ nažom.
13 studzienia dziaržaŭny abvinavaŭca zajaviŭ na sudzie, što pa spravie sabranyja nieabchodnyja dokazy, zasłuchanyja śviedki, abvinavačvany pryznaje svaju vinu, i z ulikam abstavinaŭ, jakija abciažvajuć i źmiakčajuć vinu, paprasiŭ pryznać žychara Homiela vinavatym pa častcy 1 artykuła 139 KK (zabojstva) i pryhavaryć da 10 hadoŭ pazbaŭleńnia voli.
Advakat prasiŭ pierakvalifikavać artykuł 139 KK na artykuł 141 KK (zabojstva ŭ stanie afiektu) i pakarać jaho padabaronnaha ŭ adpaviednaści z normami hetaha artykuła. Jon patłumačyŭ, što padabaronny doŭhi čas znachodziŭsia pad traŭmavalnym uździejańniem u vyniku supraćpraŭnych i amaralnych pavodzinaŭ byłoj žonki. «U niejki momant Siarhiej straciŭ kantrol nad saboj. Jon zapatrabavaŭ viarnuć hrošy, kroŭna zaroblenyja, ale pačuŭ abrazy. Heta było toje namahańnie, toj spuskavy kručok, u vyniku jakoha i adbyłosia złačynstva», — adznačyŭ abaronca.
Prysud pa spravie budzie abvieščany 16 studzienia.
