Administracyja Nacyjanalnaha histaryčnaha muzieja (NHM) Biełarusi maje namier padać u sud na ahladalnika ANT Alaksieja Michalčanku, kali jon nie paprosić prabačeńnia za svaje vykazvańni pra ekspazicyju i dziejnaść filijała NHM — Muzieja sučasnaj biełaruskaj dziaržaŭnaści, jakija prahučali ŭ efiry telekanała ŭviečary 14 studzienia ŭ aŭtarskim videabłohu «Jak jość».
Svaju pazicyju kalektyŭ histaryčnaha muzieja vykłaŭ u adkrytym liście staršyni praŭleńnia ZAT «Druhi nacyjanalny telekanał» (ANT) Ryhoru Kisialu, što apublikavany na sajcie NHM.
U svaim videabłohu Michalčanka raskrytykavaŭ ekspazicyju muzieja, zajaviŭšy, što jana nie stvaraje patrebnaha efiektu, u toj čas jak pavinna «napaŭniać honaram sercy hramadzian Biełarusi i vyklikać pavahu ŭ pryjezdžych». Tak, na jaho dumku, kopija Dekłaracyi ab niezaležnaści dla nahladnaści pavinna zajmać usiu ścianu. Ekanamičnyja pośpiechi dziaržavy treba prailustravać vialikimi źlitkami zołata i najaŭnaj infarmacyjaj ab zołatavalutnych reziervach. Pamienšanuju kopiju spadarožnika BKA, skazaŭ jon, treba prymusić ruchacca na fonie zornaha nieba, a ŭ zale raźmiaścić sapraŭdnaje koła samazvała «BiełAZ». Taksama jon miarkuje, što ekspazicyju treba dapoŭnić vaskovaj fihuraj bijatłanistki Darji Domračavaj, čyj kaścium zachoŭvajecca ŭ zale, i fihuraj Alaksandra Łukašenki.
Kiraŭnictva NHM ličyć, što Michalčanka raskazaŭ pra muziej u niekarektnaj formie i skaziŭ fakty. Na jaho krytyčnuju zaŭvahu pra składanuju sistemu dostupu va ŭstanovu ŭ liście skazana, što muziej znachodzicca ŭ budynku režymnaha abjekta — Administracyi prezidenta i patrabuje asablivaj palityki biaśpieki.
Kopija Dekłaracyi ab niezaležnaści ŭ tym vyhladzie, u jakim jana demanstrujecca ŭ ekspazicyi, na dumku muziejščykaŭ, «najbolš dakładna adlustroŭvaje charaktar i duch epochi, stylistyku afarmleńnia dakumienta». «U hetym vypadku važnym źjaŭlajecca nie mastackaja forma padačy infarmacyi, a źmiest. <…> Jak praviła, vonkava niesamavity artefakt emacyjna bolš nasyčany», — pierakananyja ŭ NHM.
Interaktyŭnamu stendu ab zołatavalutnych reziervach krainy i kołu «BiełAZa», ličać u histaryčnym muziei, nie miesca ŭ muziei kłasičnaha typu, asnoŭnaja funkcyja jakoha zaklučajecca ŭ aśviecie, a nie ŭ zabavie.
Paraŭnańnie Michalčanki spadarožnika BKA z «dziŭnym čamadanam» muziejščyki nazvali abraźlivym. Jany padkreślili, što ŭ zale vystaŭlenaja dakładnaja kopija aparata, pamienšanaja ŭdvaja, a makiety spadarožnikaŭ na fonie zornaha nieba «možna ŭbačyć u inšych śpiecyjalizavanych ustanovach».
Dyrekcyju NHM aburyŭ vyraz Michalčanki, što ŭ muziei vystaŭleny «kaścium Domračavaj na maniekienie sa Ždanoŭ». Muziejnyja rabotniki zajavili, što ličać niedapuščalnym užyvać žarhonnyja vyrazy ŭ efiry nacyjanalnaha telekanała. Prapanova vystavić u zale vaskovyja fihury viadomaj spartsmienki i prezidenta jany nazvali absurdnym.
Paraŭnoŭvać roznyja pa źmieście i funkcyjach muziejnyja ŭstanovy, jak heta zrabiŭ Michalčanka, u histaryčnym muziei ličać niedapuščalnym u toj ža stupieni, u jakoj «supracoŭniki Muzieja sučasnaj biełaruskaj dziaržaŭnaści nie stanuć u hołas paraŭnoŭvać jakaść prahram roznych telekanałaŭ».
Słovy ahladalnika ANT adlustroŭvajuć jaho asabistaje mierkavańnie, ale jany prahučali «ŭ maštabach usioj krainy». Vykazvańni Michalčanki, adznačyli ŭ NHM, «nanosiać dziejnaści muzieja ekanamičny ŭron» i «advodziać ad jaho patencyjnych naviedvalnikaŭ».
«U vypadku admovy Alaksieja Michalčanki dać publičnyja prabačeńni Nacyjanalny histaryčny muziej pakidaje za saboj prava źviarnucca ŭ sud dla abarony honaru, hodnaści i dziełavoj reputacyi muzieja zhodna z art. 153 Hramadzianskaha kodeksa», — havorycca ŭ liście NHM.
