Infarmacyja pra biaśpieku Biełaruskaj AES padajecca vielmi vybaračna, zajaviŭ 26 studzienia ŭ interv`iu radyjostancyi Ziniu radijas ministr zamiežnych spraŭ Litvy Linas Linkiavičus, paviedamlaje BiełaPAN sa spasyłkaj na litoŭski partał Delfi.lt.
Dypłamata zaniepakoiła zajava ekśpiertaŭ słužby MAHATE pa ahladzie placoŭki i kanstrukcyj atamnych ab`iektaŭ z ulikam źniešnich pahroz (SEED) pa vynikach misii na BiełAES ab tym, što Biełaruś naležnym čynam uličyła ŭsie patencyjnyja pahrozy stancyi.
«Hetaja navina jašče bolš zaniepakoiła, tamu što zusim skažajucca fakty, i nas abvinavačvajuć u tym, što my nie rady ich pośpiecham, ale pośpiech tut ciažka ŭhledzieć, — skazaŭ Linkiavičus. — Ich padača infarmacyi pra biaśpieku vielmi sielektyŭnaja, vybiralnaja, i, mahčyma, navat usie viedajuć, što MAHATE nie pryjazdžaje praviarać sama toje, što joj u hałavu pryjdzie, a pryjazdžaje tady, kali jaje zaprašajuć. Heta śpiecyjalizavanyja bryhady, kamisii, hrupy ekśpiertaŭ, jakija praviarajuć tolki tyja siehmienty, na jakija ŭkazvaje bok, što zaprašaje».
Pavodle słoŭ kiraŭnika litoŭskaha MZS, Biełaruś kaža pra pośpiech usiaho prajekta, atrymaŭšy tolki frahmientarnyja vysnovy misii.
Raniej kiraŭnik litoŭskaj Dziaržaŭnaj inśpiekcyi pa biaśpiecy atamnaj enierhietyki Michaił Miemčanka zajaviŭ, što ekśpierty misii MAHATE acanili BiełAES tolki pa dvuch z šaści modulaŭ SEED, tamu praviedzienuju misiju nielha razhladać jak poŭnuju.
Ekśpierty MAHATE praviali 16—20 studzienia misiju SEED na Biełaruskaj AES. U papiarednich vysnovach pa vynikach misii pradstaŭniki ahienctva adznačyli, što ŭ prajekt BiełAES zakładzienyja kanstrukcyjnyja paramietry, jakija dapamohuć joj vytrymać samy horšy z mahčymych scenaryjaŭ, jakija ŭličvajuć źniešnija pahrozy.
Ekśpierty zajavili, što kanstrukcyjnyja paramietry stancyi «raźličanyja na takija niebiaśpiečnyja ź`iavy, jak ziemlatrusy, pavodki, ekstremalnyja ŭmovy nadvor`ia, a taksama na źniešnija pahrozy antrapahiennaha charaktaru».
Členy SEED-misii stanoŭča acanili toje, što ŭ Biełarusi patencyjnyja pahrozy, charakternyja dla abranaj placoŭki budaŭnictva AES, «sistematyčna i ŭsiebakova analizujucca na asnovie dobra prapracavanych kryteryjaŭ».
Ekśpierty misii taksama rekamiendavali biełaruskamu boku bolš dbajna prapracavać dakumientacyju pra pahrozy, jakija mohuć uźniknuć z-za papadańnia małanki, źviazanyja z elektramahnitnaj aktyŭnaściu, a taksama dakumientacyju ab siejśmičnaj aktyŭnaści ŭ rajonie budplacoŭki.
