Try prahramy «Sajuznaj dziaržavy» u śfierie abaronnaha i vajenna-technałahičnaha supracoŭnictva byli vykananyja ŭ 2016 hodzie, paviedamiła hazieta Minabarony Biełarusi «Vo słavu Rodiny».
Heta prahramy «Umacavańnie pamiežnaj biaśpieki Sajuznaj dziaržavy na pieryjad 2012—2016hh», prahrama «Kompomat», jakaja datyčycca technałohij stvareńnia kampazitnych materyjałaŭ, a taksama prahrama «Sajuzny ciepłavizar».
Poŭnaja nazva prahramy «Kompomat» — «Raspracoŭka inavacyjnych technałohij i techniki dla vytvorčaści kankurentnazdolnych kampazicyjnych materyjałaŭ, matryc i armirujučych elemientaŭ na 2012—2016 hh». Biełaruś ukłała ŭ prahramu 487 młn rasijskich rubloŭ ź biudžeta «Sajuznaj dziaržavy», Rasija — 904 młn. Jašče prykładna stolki ž kožnaja kraina znajšła z pazabiudžetnych krynic. Takim čynam ahulnaje finansavańnie skłało kala 2,8 młrd rasijskich rubloŭ za 4 hady, śviedčyć sajt Pastajannaha kamiteta «Sajuznaj dziaržavy».
Ź biełaruskaha boku prahramu kuryravaŭ kancern Biełnaftachim, metaj prahramy była raspracoŭka roznych šmatfunkcyjanalnych palimiernych i vuhlerodnych materyjałaŭ z novymi jakaściami tryvałaści (u tym liku vohnie- i termatryvałaści), masy, hukapahłynańnia. Taksama pavinny byli raspracoŭvacca novyja zmazačnyja materyjały i madyfikavanyja epaksidnyja smoły.
«Sajuzny ciepłavizar» kaštavaŭ abiedźvium krainam prykładna pa 0,5 młrd rasijskich rubloŭ, zakup ažyćciaŭlaŭsia z 2013 hoda. Metaj było impartazamiaščeńnie — raspracoŭka elemientaŭ dla novaj ciapłovizijnaj techniki vajskovaha i cyvilnaha pryznačeńnia. Ź biełaruskaha boku asnoŭnuju pracu rabiŭ «Intehrał», a suvykanaŭcam była kampanija «Płanar». Napačatku 2016 hoda ličyłasia, što prahrama akupicca za 6 hadoŭ.
Ahulnyja vydatki na dźvie zakončanyja ŭ 2016 hodzie vajenna-techničnyja prahramy skłali kala 3,8 młrd rasijskich rubloŭ — prykładna $60 miljonaŭ pa sučasnym kursie.
